Mizoram State Animal Welfare Board (MSAWB) chuan dan tlawhchhanin Mizoramah ui talh leh ui sa zawrh tihrem a nih theih nan hmalak an rél tawh a; dan an tlawhchhanah ui talh leh ui sa zawrh khap a ni lo thung.

Tarlan tawh angin, June 20, 2023-a Mizoram State Animal Welfare Board hotute an chairman Lalrinawma, AH&Vety minister hoa Secretariat conference hall-a ṭhukhawm chuan ui talh leh ui sa zawrh a tlem theih nan dan anga hmalak an rêl a ni. Meeting hi AH&Vety secretary Lalzarmawii'n a kaihruai.

MSAWB meeting-in ui talh chungchanga an rorel sorkar thuchhuahin a tarlan dan chu, "Ui talh leh a sa zawrhnate a lo tlem zawk theih nan The Mizoram Animal Slaughter (Amendment) Act, 2020 chu khauh taka kalpui ni se, ui sa zuar tihrêm nan ui talh leh a sa zuar ṭhinte lakah a ṭul anga complaint thehlut turin MSAWB chuan hma la se tih an rel," tih a ni.

Ui talh leh ui sa zawrh tihrem a nih theihna atana hmalakna tura dan an tlawhchhan chu The Mizoram Animal Slaughter (Amendment) Act, 2020 a ni. Hemi chungchangah hian Vanglaini palai zawhna chhánga AH&Vety department hotute sawi danin, The Mizoram Animal Slaughter (Amendment) Act, 2020-ah ui talh leh ui sa zawrh leh ei khap a ni lo a; dan anga ran talh phal tarlan zingah erawh chuan ui a tel lo.

The Mizoram Animal Slaughter (Amendment) Act, 2020-ah hian dan anga ran talh theih chi hrang hrang tarlan a ni a; bawng, láwi, sial, vawk, beram, kêl, sazupui, ár lam chi leh sava chi hrang hrangte a tel laiin, ui a tel lo a ni.

Hetih lai hian, Aizawl Uisa Zuar Association (AUZA) chuan MSAWB rorel hi an duh lo a, hma an lak dan tur ngaihtuahin June 25, 2023 an ṭhukhawm. An rorelte hriat theih a nih rih loh rualin, AH&Vety Minister hmuh ṭha an ti a, mahse, nimin thleng kha chuan an la hmu lo tih AUZA President chuan a sawi.

AUZA President chuan, ui talh leh a kaihhnawih thilah Congress party-in sorkarna an chelh lai khan ui talh leh ui sa zuartute chu People for Animals, Mizoram-in court-ah an khin tawh thu a sawi a; anmahni khingtute'n dan an bawhchhe fai vek zawk a, chuvang chuan an chak ta lo niin a sawi bawk.

AUZA President sawi danin, ui talh tur phurh leh enkawl danah dan bawhchhiatna a awm a, an man dawn a nih chuan police hoa man tur a ni a, ui mante chu enkawlna hmun him leh ṭha takah enkawl tur a ni a, ui chu chiu hlum a nih dawn pawhin veterinery doctor kaihhruaina hnuaiah chiu hlum tur a ni bawk. Heng zawng zawngah hian anmahni court-a khingtute chu an hlawhchham (fail) fai vek a ni.