[{"_1":2,"_50":-5,"_51":-5},"loaderData",{"_3":4,"_9":10},"routes/_landing",{"_5":6,"_7":-7,"_8":6},"loggedIn",false,"token","isSubscriber","routes/_landing.article",{"_11":12,"_48":49},"publicArticles",[13,30,39],{"_14":15,"_16":17,"_18":19,"_20":21,"_22":23},"id","177445","title","AIZAWL NUTE HI","body","

Zoram khawvela Mizo nute chanchin hi chu ka hre tam lo hle a, nimahsela, Aizawla cheng nuhote chanchin tlangpui hi chu ka hre ve nual awm e. Ka hriat chhunte chu ka'n hrilh ang che u. Aizawla cheng ve lo nuhote khan Aizawl nute khawsazia hi in awm dan nen a inang em, lo khaikhin teh u le.

Aizawl nuhote hi chu tu emaw Pathian thusawi thiam deuh thu sawi an ngaihthlak hian an rilru khawih lai deuh ni ngei turah, ‘Halleluiah, Amen,’ tia au an awm ṭhin a. Aizawla Biak In tinah hian nute hi a lâm tam berte an ni a, ṭawngṭai rual a awm chang hian nuho zingah hian chham duah thiam riau an awm ṭhin bawk.

Kohhranin lênkhawm a buatsaih chânga len khawm nuam ti leh taima ber berte chu nute an ni a. Eng emaw changa Pathian thu sawi khawm nikhuate hian Pathian thu sawi nuam tite chu nute tho hi an ni. Pathian thu tuipui leh duh em em Aizawl nute hian Kristian chhungkua pawh an tuipui em em tho a, Kristian Chhungkaw Campen-in an feh chhuak tam hle a ni.

Aizawl nuho hi Kohhran Hmeichhia pualin sum an tuak nasa em em a, in chhung mamawh hi chu zawrh loh ahleih pawh an nei lo a ni ber e. Damlo kan leh khawhar ina len te hi an taima em em a, an ṭhiante leh an duhsak zawngte chungah an thilphal hle bawk a. An pâk zawngte lakah chuan an ká pawh zen ila min seh lo vang tih tur an ni. Chuvangin, Aizawl nute hi kohhran leh khawtlang tinuamtute an ni, a tih theih awm e.

Hetihlai hian, Aizawl nute zingah an chhungkua ngaihsak lo fe fe an tam hle a. Mahni in chhung awp lum hman lova pawn lama inhmang zo hmuh tur leh hriat tur an tam hle a ni. Hengho hian inchei an ngaina tlangpui a, ei leh in pawh an duh tlangpui bawk a. Puipun nikhua a awm changin a ser zinga a mei ang maiin an lang ve vat zel a. Mahni chhungkua vei loin mi chhungkua an vei zawk emaw tih tur an ni.

Nu ṭhenkhat hi chuan an fate an piangthar em, tih lam pawh an ngaihtuh lo va, an fate’n sum an thawh chhuah a, ruih theih thil an tih loh chuan an ngaih a ṭha em em a ni. Chhungkua uap lum hman lo nu an tam em avang a ni mai thei, ṭhalai zingah ruihhlo ngai an tam viau chhan hi. Aizawl nute hian mahni in chhung uap lum ṭhain an fate tih tak zetin enkawl sela chu, heti em em hian ruihhlo ngai Aizawl khawpuiah hian an tam lo mai thei a ni. Aizawl nu ṭhenkhat, loh theih lova sum zawn ngai an awm a, nimahsela, nu ṭhenkhat hi chu eng emaw pawl tan an inhman avanga fate ngaihsak hman lêk loa hmanhlel an awm a ni.

Kan sawi hmaih hauh lo tur chu, Aizawl nuho zingah hian chapo tak tak an awm ve a. Hausaa inngai, tu mah mamawh lo ni awm taka khawsa, mi harsa zawkte enga maha ngai lo, an ina inhlawhfa a, a ni rêt-a an chhawr te, an in chhung tifai tur leh sekrek khawi tura an rawihte ngei pawh chhun thingpui leh a hmeh takngial pawh pe duh lote pawh an awm a. Heng ang tih ching zingah hian kohhran hmeichhie hruaitu ni hialte pawh an tel a ni awm e. Pathian fak a, Biak Ina lâm lâmte pawh an bâng chuang lo ni tur a ni. Chuvangin, hengho hi Pathian lawm tlak an ni ang em tih chu ngaihtuah tham tak a awm a ni.

Mizo hnahthlak zawng zawngte tan Aizawl hi kan Jerusalem a nih avangin, Aizawla cheng nute hi an pawimawh hle a. An awm dan leh an chezia zawng zawng hi Mizo hnahthlak nute hian an thlir vek si a, Krista chanchin ṭha nen inmawia an awm a ngai hle a ni. An thawm thang vel hian Zoram khawvel a dêng chhuak zel mai si a. Chuvangin, Aizawl nute u, nu zaidam leh hawihhâwm, pasal fanaute tan pawha innghahna tlak ni turin ṭan la sauh sauh te u.

Aizawl nute hian thil tam tak in ngaihtuah a, tih ve vek in tum a, in buai a nih hi. Thil pakhat chauh in tan a pawimawh, chu chu in chhungkua kha a ni. In chhungkua ṭheuh kha uap lum mai rawh u. Chuti chuan in tan leh in chhungkua tan a ṭha ang a, Van lam pawh an lawm ngei ang. Mi tin tan chhungkuaa vanram thlen hi a pawimawh ber si a.

- Hausanga Hauzel

","publish_date","2026-10-21 18:56:29","publicWriter",[24],{"_14":25,"_26":27,"_28":29},"4657","name","- Hausanga Hauzel","address","",{"_14":31,"_16":32,"_18":33,"_20":34,"_22":35},"177444","ZPM an lian – An thawm ri hlek pawh a lian zel","

Nupui hmelṭha tak nei ṭhenawmte nupa chu chhungkaw thil eng emaw hleka an han inkhak deuh hlek tawh phawt apianga, a engamah hmaa an ṭhenawmpa phûr fahran maia a lo inchei ve em em nghal ringawt zel ṭhin ang leh, kan Zoram tunlai politic boruak vel hi chu a inang ka ti ṭhin.

ZPM lo lan hnu leh an han sawrkar tak hnu hi chuan party policy inelna lam leh han khaikhin tur lam vel pawh hi awm tawh meuh lovin, party han inbûk tawk deuh tur pawh hi awm tawh lovin, party dang zawng zawng leh Mizo mipui mi tinte hian ZPM lam hi kan hawi ta deuh ṭhup mai zawng a nih hrih ber mai hi. An chet vel dan, an thil tih apiang leh an thu sawi apiangte chuan kan beng hi a verh em em zel tawh mai a. An chhungkaw han insîksawi thawmin ri deuh hlek an han neih deuh hlek apiang lah chuan kan lo ngaihven hle ṭhin a. Party dang pawh hian an beng an lo chhi hru zel tawh a, an lo za chung tawh mai thin a nih hi. Mizoram politic khawvel hi ZPM hian a la luah khat hneh hrih chu a la nih ber mai hi.

Party dang ho pawh hian theihpatawpa ZPM sawi chhiat mai lo chu tih tur dang an hre ta lo emaw ni tih tur hi a ni ta hrih zawng a nih ber mai hi. MNF phei hi chuan sawi chhiat mai pawh ni lovin, ZPM party hi hawlhphel phet tumin, hem thlak phet chu an lo tum ve ngar ngar bawk a. Mahse, an la hlawhchham zel hrih chu a la nih hi.

Amaherawhchu, social media ṭhenkhata heti em ema ṭawngkam tui tang lo tak tak leh ṭawngkam bawlhhlawh tak tak, ṭawngkam chhe hnuaihnung mawl tak tak tinreng maia opposition ho, a bik takin MNF hoin ZPM leh Pu Lalduhawma an han diriam nasa lutuk ṭhin hi chu a zahthlak zawk lutuk a ni. Hetiang thu lo chhiartu nih pawh hi zahthlak zawk tak a ni. Hetianga titute avang hian an party hian hlawkna pakhat mah an hmuh belh phah lo mai pawh ni lovin, anmahni leh an awmna party chu an timualpho nasa mai mai a ni. ZPM laka vuivaina lo nei ve deuhte pawhin henghoin ṭawngkam chhe tinrenga ZPM leh Pu Lalduhawma an beih ṭhin avang hian, ZPM pawh chu haw phal leh lovin an ṭan bur phah zawk zel ang tih hi a chiang reng. Hetiang tih chingho hi chu ZPM-ah hian luh pawh tum dawn mah se, ZPM ho hian, 'E khai, nangni chu kan duh lo che u. Kan party in tichhangchhe mai mai. Kan party in tiṭawp mai mai' an lo tih duh tur tawk vel kha an nih duh hmel viau lehnghal a.

Kei pawhin eng emaw changa ZPM sawrkar han sawisel deuhna tur leh han khak deuhna lam te pawh hi han ziah ve ka duh chang te pawh hian, hengho ṭawngkam chhe lutuk avang hian, ZPM fakna leh opposition ho demna lam hlir hi min ziahtir leh phah zawk fo ṭhin a ni. Chutiang chu mi tam tak rilru pawh a nih ve tho ka ring.

Political party te hi chu eng dang mah ngaihtuah lova sum leh thuneihna chiah zawng ngar ngar, lal chiah inchuh ngawr ngawr, engti zawng pawha a dingchang zawk nih tuma khawsa ṭhinte an ni tih hi chu mipuite hian kan hre thiam ve tawh lutuk a ni.

Chutiang chu ni mah se la, he khawvel democracy inthlang ramah hian roreltu tur kan thlan chu a ngai ve miau mai ṭhin si a. Chuti chuan, pawisa duh avanga party ruihchilh ni ve lo, khua leh tui ṭha zinga a tam zawk, rilru hrisel pangngaite hi chuan, chuti ang party leh mihring zinga tlema rinawm deuh leh rintlak deuh tur chu kan lo zawng ta ṭhin a nih hi.

Chuti ang chu thil awm dan a nih avangin, kawng hrang hrang leh thil hrang hrang kan han ngaihtuahin, hun kal tawh leh party hrang hrang leh mi hrang hrang kan han ngaihtuahin, mipui tam zawkte chuan tuna ZPM party hi kan lo thlang ta hrih chu a lo nih tak hi.

Hei, kan la tifuh hrih zel chu a la nih ber hi a. He leiah hian duhthusam political party sawrkar hi chu engtikah mah kan hmu zo dawn chuang lo va. Keimah leh kan chhungkaw duhthusam dan ang thlap thlapa awm thei tur sawrkar hi chu kan dam chhungin kan hmu zo lo vang. Mi chi hrang hrang, dan chi hrang hrang, tih dan hrang hrang awm karah hian anni pawhin an duhthusam ang thlap thlapin engkim hi an ti thei bik bawk hek lo. Duhthusam awm thei lo rau rauvah chuan tuna ZPM party hi chu a hmaa mite ai chuan a la ziawm hrih chu a ni mai lo'm ni? A hmaa mite ai chuan an lang tlang zawkin mipui nen pawh kan inhnaih zawk hle a ni lo'm ni? A hmaa mite ai chuan ram leh mipui lam hawi deuh ngar ngar an ang deuh zawk a ni lo'm ni? Anmahni pawh an lan dan leh an cheziaahte, an thil tih dan leh an thu sawiahte, an hmel hrim hrimah te pawh hian an tih tak hmelin an rinawm hmel zawk deuh chu a ni lo'm ni? Chuvangin, ram leh hnam tana pawi tur lam emaw, thil huatthlala tak lam emaw, eirukna leh fair lo taka chetna lamah hi chuan rinhlelhna leh sawisel tur kan la nei lem lo chu a nih hmel hrih hi.

Mahse, hei engtizia nge maw ni ta mai chu le, tunlai hian ZPM boruak chu Zoram pum deng chhuak khawpa a lo rik tak hluai mai chu ni le, kan tih pawhin, ele, eng dang ni lovin, anmahni party chhungkaw inrelbawlna lam boruak vel bawk mai mai maw le, tih bak chu sawi tur dang a vang khawp mai. Eirukna lam emaw, fair lo taka thil tih lam emaw, hriat chian chiah si loh, mahse, sawrkar hmasate anga rinhlelhna riau leh ngaihṭhat theih tlat lohna lam avanga ri ta hluai pawh chu kan lo ni leh mang si lo zawng a lo nih hi. ZPM nge nge, mi zawng zawng hian kan ngaihvenin kan lo la tuipui ber hrih zawng a la nih hi.

State pakhat pumpui political issue lian ber, a ram puma buaipui luai luai atan chuan party pakhat chhungkaw inrelbawlnaa hruaitu nihna, post chelh vel lo lungkham em em mai hi a ho deuh lo maw? Nge ni, tunah hrih hi chuan kan sawrkar rinhlelhna leh an dik lohna han sawi chiam tur leh buaipui luai luai tur thil dang hi a la awm mang hrih si lo va, hetia an party hruaitu nihna post chelh chungchang vel bak lo hi chu thil dang han chirhtheh tehchiamna tur la awm hrih lo hi chu a ropui lutuk zawk, kan ti zawk mai dawn em ni ang?

ZPM party president leh Chief Minister a nih kawp theih leh theih loh lam hi kalphung thar mipuiin kan lo beisei ber chu emaw ni dawn le? Ram hmasawnna daltu lian ber leh mipui tana phurrit tak tur chu a lo ni dawn em ni le? Heti tak maia kan ngaihven leh eptu party zawng zawng pawhin pawi an lo tih em em mai chu ni le.

VUC member pahnihte ban avang ringawt hian ZPM party chu chhe ta vek tur ang leh ZPM sawrkar pawh chu tla ta nghal tur ang maia party dang an lo lawm viau mai hi eng emaw a awmzia ni le? Heng VUC member pahnih bang tate hian party dang an zawm awm thu pawh chu chiang taka kan la hriat hma hian, party dang lah chuan sawrkar an lo inbeisei nghal ringawt emaw ni lehnghal ni.

Mipui rilru fim leh rilru hriselte hi chuan ngun taka rei tak an lo ngaihtuah hnuah, zawi zawia an rilrua negative lam leh positive lam thil lo lian chho hret hret zel tawh chu, a tawpa thutlukna an han siam tawh meuh hi chuan, mi puitling, mi pangngai chin tawh hi chuan chuti mai maiin an rilru hi an thlak leh tawh ngai ṭhin lo, tih te pawh hi hria ila.

CM leh Party President nih kawp leh kawp loh, VUC member pahnih khat bang tih vel mai mai hian Mizo mipuite rilru hi chawplehchilhin chuti mai maiin a tidanglam pha dawn lo a. Khi thil pahnih avang khian ZPM party leh sawrkar hi a chhe ta hle tihna lah a ni der bawk si lo. Chuvangin, ZPM party leh an sawrkar hi an intiamnate kha hre reng chungin, ram leh mipui lam chauh hawiin, kalphung ṭha leh kalphung thara tluang taka kal zel turin duhsakna ka hlan e.

Chuvangin, ṭhenawmte chhungkaw chanchin ringawt buaipui leh bihthla duk duk reng tawh lovin, thawm an neih hlek apianga lo phur ve em ema lo inchei nalh ve em em nghal zel ringawt lam chu buaipui tawh lovin, ṭhenawmte tluk tur khawp leh an aia ngaihzawnawm zawk, an aia hmelṭha zawka awm dan turte pawh hi lo zir tawh zawk a ṭha mai lo maw? Ṭhenawmnu hmelṭha kan tih viau si chuan lal ve thuai thuai kha a chakawm tawh awm si a.

Mahse, mipui lam hian thil an han ngaihtuah chiang ang a, hmana mite bawk kha maw, min lo ti leh si ang em le?

- K. Hmingthankaia

","2026-10-21 18:56:04",[36],{"_14":37,"_26":38,"_28":29},"2791","- K. Hmingthankaia",{"_14":40,"_16":41,"_18":42,"_20":43,"_22":44},"177443","Ni 17.10. 2026-a NGHAM thuchhuah kha!","

A tir phat aṭanga chhiarin 'Health Minister-in MUHCS zawm tura a sawm bik' tih ṭawngkam an hman aṭang hian an thu vai vir tum dan a hriat nghal. Health Minister hian sawm bik a nei lo a, Synod Hospital facility nei pha hospital lian pathumte a sawi mai a ni. An ṭawngkam hman duh dan aṭang khan inremna lam hawi aiin, a bawplawk zawng a thu lak a, harsatna siam an tum niin a lang.

MUHCS hman tirh aṭangin sawrkarin a sawm a, chhanna hmasa ber chu, 'Rate-ah an buai loh thu leh cashless an duh loh thu' a ni. Media aṭangin mipuiin kan hriat vek a rinawm. Tun hmain bill bá Rs vbc. 4 chuang zet a awm thu te pawh an sawi a nih kha.

Sawrkarin bill a pek ṭhat chhoh tak em avangin cashless sawi bovin, rate hniam an chhuanlam leh a! Mipuiin kan hriat chin, an indawrna reng rengah pawh cashless lam ni tawh loin, rate chungchang zel a ni tawh. A tira an buaina kha cashless a nih avang hian MUHCS 1.0 kalpui a nih ṭan tirh, March 2025 khan Vanglaini-ah article ka ziak tawh nghe nghe a, khang hun laia private hospital ho buaina kha rate ni lovin, cashless a ni tih chiang takin a lang. Tunah chuan NGHAM ho buaina hi rate a ni ta daih mai! NGHAM anga intelkhawm a, rate sang taka sawrkar nawr thluk kha an tum ber a ni tih hai rual a ni lo. Sawrkarin pawl anga tumah dawr a tum tawh loh chhan hi hei vang hi a nih a rinawm.

Hemi hnuah hian hospital mal tê têa dawrin, hospital lam-te'n an rate aṭanga -10% hniam an duh thu sawi a awm a, chu chu a sang lua em em mai si! Chuti chung chuan sorkar chuan rate pawh revise-in, medical package 2,200+Incentive% aṭangin 3500+Incentive%-ah a tisang a, chuti chung pawh chuan harsa an la ti em em.

Synod rate issue a irh chhuah tak aṭangin private hospital-te'n Synod rate ang ang an duh thu chanchinbu lamah tarlan a ni ta a. Hospital ṭhenkhat phei chuan ram hruaitute hnenah ṭawngka ngei pawhin an hrilh a ni awm e. Hemi a nih tak avang hian sawrkar chuan empanel turin an inpeih reng thu a chhuah ta nghal a. Sawrkar inhawn zauna a fakawm thlawt a ni.

Ni 17.10.2026 khan NGHAM chuan thuchhuah an nei leh a. Health Minister-in NGHAM angin kan dawr tawh dawn lo a ti lawm lawm chungin a tûk lawka thuchhuah an siam leh nghal zat hi sawrkar leh a changtu Minister thukhawchang an ngaih pawimawh lohzia a lang chiang hle.

NGHAM member hospital ṭhenkhat chauhin an zawm a, a zawm ve lo hospital-te tlakchhiat an hlauh thu an sawi phei hi chu an mawng an hlim mai a ni. Pawl anga intelkhawma rate sang nawr ngar ngar, 'Rate Cartelisation' hlauhawm tak tih an tumzia a lang. Mipui hmakhua aiin an sumdawnna leh an pawl hamṭhatna tur an ngaihtuahzia tilangchiangtu a ni. Dam lohna hi sumdawnna hlâwk taka chantir tum tlat kan private hospital-te hi inchhût chiang se.

Sorkar hnathawkte fuih pawrh zawnga reimbursement hlâwk ber chi an la sawi ri fo te hi, hospital sumdawnna hlawk an tumzia tilangtu a ni. An thuchhuaha mipui hmakhua ngai awm taka lan tum, kan dam loh ni khuaa damlo bill a sang thei bera min rawk tum leh site thukhawchang hi hlin tur ber pawh a awm lo e. Medical prefession hi sumdawnnaah chantir tum lul suh se, tiin a tawp ka’n khâr teh ang.

- Dr. Lalrinenga Hlawndo, Agape Lodge

","2026-10-21 18:55:37",[45],{"_14":46,"_26":47,"_28":-5},"6573","- Dr. Lalrinenga Hlawndo, Agape Lodge","publishDate","2026-10-21","actionData","errors"]