AMC-in Aizawla chenna in hnaiha vawk vulh titawp tura hmalak an rêl

June 28, Nilainia Aizawl Municipal Corporation (AMC) Board of Councillors’ (BoC) ṭhukhawm chuan Aizawla mihring chenna hnaih lutuka vawk vulhte titawp tura hmalak a rêl.

AMC BoC ṭhutkhawm hi mayor Lalrinenga Sailo-in a kaihruai a, executive councillor (Cash & Accounts) Lalringliana'n AMC Financial Statement 2022-23 a pharh a, sawiho a ni. Corporator-te motion put luh sawiho a ni bawk.

AMC hotute chuan, Aizawl khawpuia mihring chenna hnaih lutuka vawk vulh titawp turin chak taka hmalak an rêl a; mihring chenna aṭanga ft. 100 aia hnaiah vawk vulh khap ni se an ti a, vawk vulh mekte'n insiam remna hun an neih theih nan January 15, 2024 aṭanga kenkawh ni se, an ti.

Aizawla traffic jam tihziaawmna tur leh mipui tana awlsam zawkna turin Aizawla hmun rem­chang leh lûn bikah zana bawlhhlawh khawn an rêl a; chutih rualin, zing kara bawlhhlawh khawn kalpui mek chu a ṭul angin kalpui zel tho tur a ni.

Bawlhhlawh phur lirthei tinah puitu (helper) dah ngei ngei turin a rél bawk a, helper tel loa bawlhhlawh khawnte chu na taka hrem ni se, an ti.

AMC BoC chuan, Aizawl khawpui chhung kawtthlera electric ban leh remchang danga TV leh internet hrui leh hrui dang zam hnawk chinfel nan khuahkhirhna dan (regulation) siam turin thutlukna an siam bawk.