Mizoram State Health Care Scheme (MSHCS) hnuaia damlo bill chu November 2021 thlenga thehlut chinte pek zawh an la ni lo a; May 24, 2023 thleng khan MSHCS hnuaiah hian damlo bill bá cheng nuai 7,477 chuang a la awm; May 6, 2023 kha sorkar aṭanga pawisa an hmuh an pek chhuah hnu­hnung ber a ni. 
Kan rama buaina lian tak pakhat chu damlo inenkawlna pawisa táng reng mai hi a ni a, a sorkar zawkin scheme siamin mipuite inziak lut turin an ti a, an inziah luh hnuah sorkar lamin pawisa a pe chhuak leh thei lo hi a pawi hle a ni. 
He health care scheme ring tawktu mi ṭhahnem tak anmahni sum sengin an inziak lut a, an beisei ang sum pe chhuak thei lo a, a sorkar lam a awm reng hi a fel lo. Sorkar hian a duh phawt chuan a duhna lamah pawisa a pe chhuak thei reng a, a sem hial pawh a sem thei. Chutihlaia a inziak lutte hnena pawisa pe chhuak thei loa health care scheme kan nei hi chu mipui tán lungawi a harsa khawp ang. 
Sorkar hian a duhna lamah sum a pek chhuah theih tho avangin damlo mi mangang tak takte harsatna hi ngai pawimawh zual se, tun thlenga sum pe chhuak hleithei lo MSHCS kan nei hi ennawn a hun hle a ni.

Health care  buaina tawp thei lo

Aizawl khawpui chhung aṭanga Assam Rifles insawn chhuah dan tura inremna (MoU) duan chhin chu Ministry of Home Affairs chuan tun thlengin an la pawm lo. 
Assam Rifles insawn chhuah hun tur hi politics nen kan sawi pawlh luih tlat avang hian sawi a hlawh zui lo thei lo a, an insawn chhuah hma aṭang tawhin sawi a hlawh ta a ni. Tlemlai deuh khan Lunglei lama Municipal Council inthlan dawn hnaiah AR-te insawn chhuak mai tur angin thu a thang a, tun thlengin an la insawn chhuak ta lo. 
He thilah hian Mizo­ram sorkar thiam loh pawh a awm vak lo a, a insawn chhuak turate berin thumum an neih theih loh vangin kan ram hruai­tute hi an ṭawng sual ta fo mai. 
Assam Rifles lam hi anmahni thua awm thei an ni bik lo a, Ministry of Home Affairs thu an ngaihchan a ngai a; he lamah hian an insawn chhuah hun tur hre lo AR, state sorkar leh mipui kan awm khawm a ni ta ber mai. 
Chief Minister ngeiin kum 2019 khan AR chhuah hun tur hi Chapchar Kutah meuh a puang chiam tawh a, ama thiam loh ni loin Ministry of Home Affairs lamin an chhuah­tir leh si loh avangin kan CM hi dawt sawi ang lek lekin a lan phah tawh a, a pawi hle a ni. 
Sipai insawn chhuah thu hi sorkar chak leh chak loh tehna a ni lo a, an insawn leh tak loh avang hian sorkar dem mai lo bawk ila, an insawn ta a nih pawhin sorkar han fak chiamna tur a awm lo e. AR sawn theitu awm chhun Ministry of Home Affairs thu thu a ni tih a chiang chho zel a ni.

AR chhuah hun tur inrinsiak

Aizawl Smart City Ltd. hnuaia Zemabawk playground sak tur lungphum chu tun hnai khan Chief Minister-in a phum a, Zemabawk field tihhmasawnna tur project man hi cheng vaibelchhe 25.66 senga sak tur a ni. Contractor chu M/S Northeast consultancy services (NECS) niin October 15, 2023-a zawh tura ruahman a ni a, lirthei 100 vel hûnna tur bakah mi 1791 ṭhut theihna tur siam a ni bawk ang.
He khelmual siam tur hi sorkar thuchhuah aṭanga a lan dan chuan football khelhna tur a nih hmel a, tun hnaiah football khelmual hi ṭhahnem tak siam a ni tawh a, siam tura ruahmanna dang pawh a la awm nual a ni. Hei hi ṭhalaite leh he infiamna bika tui mite tan chuan thil lawmawm tak a nih hmel a, chutihlaiin ṭhalai ni lem lo mi ṭhahnem tham tak an awm bakah football-a tui ve lem lo mi ṭhahnem fe an awm ang tih a chiang a, tute tan emawa hnathawh thiam tur chi thil awlsam hi kan zawng a nih chuan sorkar kalphung hi a fuh lo palh ang tih hlauhawm tak a ni.
A state mal sum bawm aṭanga chhût hian Mizoram anga infiamna lama sum hmang tam hi an awm kher lo mai thei a, hei hian infiamna kawngah hma min sawntir ngei pawh beisei ila; nimahsela heng sumte hi hmun danga hman theih a nih tho chuan football khelmual siam belh leh ringawt lo zawnga kal hi he sorkar hian zir se a ṭha hle ang. Khelmual mamawhna hi a sang hle a nih pawhin kan Smart City project aṭanga kan state sum hmuhte hi thil dangah pawh hman theih a ni a, state dangin an hman ve vak ngai lohna- infiamna lamah bawk kan pawt peng leh ṭhin a, 'a hman theih tho e' tih lai changchawia kan kal chiam chiam hi chu khuareiah kan inchhir palh ang tih a hlauhawm ta khawp mai.
Mizoramah infiamna hmunhma ṭha tak tak kan nei hi a lawmawm a; hetihlai hian infiamna hmunhma siamna atana kan sum hmuhna lam hi kan en ngun deuh chu a ngai khawp mai. Sports Ministry aṭanga infiamna hmunhma buatsaihna tur kan hai chhuak thei a nih chuan thil lawmawm a ni a, chutiang ni loa thil ṭangkai dang atana hman theih PMVJK leh Smart Cities Mission aṭanga sum lian tham infiamna hmunhma atana kan hmang nasa lutuk hi chu ramin a tuar thei a ni.

Vaibelchhe 25.66 man infiamna hmunhma

External Affairs Minister chuan tun hnai khan Mizoram a rawn tlawh a, Ministry of External Affairs hmalakna huanga Mizoram tana thil pawimawhte an sawi a; Mizoram chu khawchhak lama India kawtchhuah a la nih thuai dawn avangin ngaih pawimawh a nih thu leh hmasawnna ruhrel pawimawh turte pawh la siam belh a ngai dawn nia a hriat thu Larsap nen an inkawmnaah a sawi. 
Khawvel hma­sawn zel leh politics inher chho zelah Mizoram hi khaw chhak lama India kawt chhuah a nih theih dan hi a hnai telh telh a ang hle a, sorkar laipui hotu lian lamin an sawi tawh bawk nen he hun hi a hnai chho zêl dâwn niin a lang. 
Sorkar laipui lam pawhin Mizoram hi chutiang tur chuan a buatsaih mêk a, kil tinah kawngpui ṭha tak tak a siam chho mêk a ni. Nakin lawkah sumdawnna lian tham a thleng dâwn a nih chuan tun aṭanga inbuatsaih lawk a ṭul a, infrastructure kan siam rual hian rilru lam siam fel hmasak ngai a tam hle. 
Mizoramin hma­­sawnna rahbi a rap chho ve zel a, hmasawnna lo thleng tur dawng­sawng tur hian rilru lam thlengin kan inrin lawk thiam a pawimawh a; India kawt chhuah kan nih huna a mihring nun lam kan buai lohna turin hmasawnna dawng zo tura inzirtirna kalpui tel a pawimawh hle a ni.

India kawt chhuah tur Mizoram

Aizawl khawpui chhunga iron rod, cement leh balu zawrhna dawr, dan loa hawn nia ngeia hriat 63-te chu Central YMA hmalaknain tun hnai khan khartir an ni a; heng dawr khar sakte hi hnam dangin Mizo hming hawha an hawn ni ngeia hriatte an ni. Dawr khar tir tura chhinchhiah ṭhenkhat chu an lo inkhar tawh a, hnam dang ṭhen­khat chuan Mizo hnenah an dawr te an lo hlan chhâwng hman a ni. 
Hun rei tak ata tawh he'ng sum­dawnnate hi hnam dangin an enkawl a lo ni tawh ṭhin a, ṭhenkhat chu hnam dang ta a ni a, dawr ṭhenkhat chu Mizo hming ni si a taka neitu erawh hnam dang ni si a awm. Mizoram hnam dangin dan angin sumdawnna an kalpui thei lo tih a nih laia Mizo zawkin hnam dang kawng kan hawnsak ṭhin hi a zia lo hle a ni. 
Tun hma pawhin dan loa sumdawng hnam dang an lo dap chhuak tawh ṭhin a, a hnu lawkah an sumdawnna ngai an chhunzawm thei leh mai zel a, a mak hle a ni. 
Tun ṭumah hian CYMA meuh a pen chhuak ta a, dan loa sumdâwng na nâ nâ chu an sumdawnna an chhunzawm tawh lohna tura an khap hlen theih i beisei ang. Chuti ni loa sumdawnna ngai an chhunzawm leh si a nih chuan a CYMA thleng hian rin loh an hlawh palh mai ang tih a hlauhawm a. An ring an rawlh ta sâ sâ a tawp thlengin ṭang tlang se, huaisen takin Mizo hnam tán ding ngam se a lawmawm ngawt ang.

CYMA-in a tawp thleng ngei se

Mizoram People Forum (MPF) hruaitute chuan kumin kum tawpa MLA inthlan turah hian retheite retheihna denchhena vote lei lo turin political party an ngen a, mipuite chu vote hralh lo turin an ngen. MPF General Secretary chuan, "Hun kal tawh leh kan hun tawng mek thlir hian kumin inthlanpui lo awm turah hian sum leh therhlo chi hrang hrang chelekna a nasa viau ang tih hlauhthawnna a nasa," a ti.
Kan ramah in­thlanna fel leh thiang­hlim zawk a awm theihna turin MPF a ding a, thil lawmawm tak a ni. MPF awmna leh awm lohna hmuna inthlanna kalpui dan hi a inang lo hle tih a takin kan hmu tawh a, chutihlaiin MPF awmna hmunah pawh miin an tum tlat chuan vote lei leh hralh hi dan a harsa tih MPF ngei pawhin an sawi a ni. 
MPF General Secretary-in kumin inthlanah sum a lên nasat an hlauhthawn thu a sawi hian ngaihtuah a tithui khawp mai a, kan ramah hian sum thiltihtheihna hmanga inlei tlin tum an pun zel chuan kan hmabak hi a êng lo hle a ni. Mizoramah hian an hnathawh phu loa hausa te, hnathawh mumal an neih pawh hriat loha hausa te, politician hausa thur thurte hmuh tur an awm. 
Heng mite hian inthlan dawn­ah an sum neihte hi an thiam ang zelin an hmang a, politician zingah suma inlei tlin tum te, tun aṭanga chhiat ni ṭhat nia midang aia tam uchuak taka sum chelek ṭan tawhte pawh an awm a, a zialo hle a ni. Hei bakah hian an sum neih dan hriat chian loh mi hausa ṭhen­khat hian inthlan dawnah lam ṭang siamna atan an sum an hmang ṭhin bawk a; hei hi ven a nih loh chuan MPF hlauhthawn ang hian ṭhenawm state ṭhenkhat ang maiin sum thiltihtheihna hmachhuanin kan inthlang ang tih a hlauhawm ta hial a ni.

MPF hlauhthawnna hi

Kum 2022-a YMA Rorel Inkhawm vawi 3-na chuan, 'Eirukna leh hlemhletna a reh theih nan Central YMA-in tun aia chak zawkin hma la rawh se' tih bawhzuina atan hmasawnna hnathawh hrang hrangte hna­thawhna huam chhunga YMA-ten an vil dâwn a; hna hrang hrangah sum sanction leh hnathawh inmil lo, hnathawh chhia leh rinhlelhawm a awm a nih chuan CYMA hnenah thlen tura hriattir an ni. 
Kan ram dinhmun tichiangtu chu kan kohhranten eiruk dona lam an kalpui leh kan tlawmngai pawlten sorkar hnuaia hna hrang hrang an vil tur hi a ni a, tuna kan ram kal danah hian kan kohhran leh tlawmngai pawlte an lung a awi lo tih chu phat rual a ni lo.
Sorkar hnuaia hnathawh chhe em em ṭhin hian chhan lian tak a nei a, a bul ber chu hna lian thama politician-in 'ei' an nei ṭhin hi a ni a, hei hi kan ram leh hnam ṭhanmawhbawk a ni. 
Zep thu a cheng lo a, a hna viltu engineer leh sorkar official zingah ei neih tum ran an lo awm ve leh bawk a, hnathawktuten hlawkna an neih ve leh bawk chuan a hnathawh tak takna tura sum awm hi a beitham tawh hle - hei hi kan ram kal dan dik tak chu a ni mêk. 
YMA tán pawh hna lo vil hi a lera ṭhuai ang deuh chauh a ni tawh dâwn a, a thawhna tura pawisa a taka awm zat hi a phai tawh ṭhin avangin uluk taka vil pawha beisei phak tawh lo tur hna hi a awm thluah dâwn a ni. 
Politician hausa lo ngam, politician ei nei lo ngam kan mamawh takzet a, State dangah pawh tlawmngai pawl vil lohin hna ṭha tak tak an thawk thei. Eirûkna laka fihlim politician kan mamawh a, chutiang mi kan neih chuan kan rama hnate hi tun anga tlawmngai pawlte vil rawn luih luih ngai lo hian a awm ve thei ngei ang.

YMA vil ngai kan ni ta

Aizawl SP chuan Aizawl khawlaia ruihhlo ti ṭhin buaipui turin ruahmanna siam an tum thu a sawi a; ruihhlo dona atan sorkar aṭangin pawisa pawh an hmuh tawh thu a sawi. 
Aizawl khaw­puiah ruihhlo a hluar a, khawlaiah langsar tak takin ruihhlo zuar hmuh tur an awm a, damdawi rui tih hriat reng te pawh chhun pachangah khawilaiah hmuh tur an awm ṭhin. Heng mite zalen taka an awm theih chhan pakhat chu a vengtu an mumal loh vang a ni ber a, a khaptu tur lam hi an inringthul a ang fo. 
Tunah chuan Police lamin ruahmanna an siam dâwn ta a, ruihhlo hi kan tirem thei lo a nih pawhin tun ang taka zalen leh ualau taka dah hi chu a reh tawh ngei ang. 
Kan khawpui lian berah mikhual tán pawha hmuh hrehawm tur leh a khawpui neitute tana mual­phona tur khawpa rui hmuh tur an tam lutukte hi a zia lo hle a ni. 
Sorkar tán engkim hi ven sen a ni lo a, khawtlâng hruaitute nen ṭang ruala thawh a ṭul. Hetihlai hian chhun zan zawma duty hi khawtlang tán a theih loh a, hun chan insem deuh pawhin khawpui lunlai tal hi chu hneh taka ven theih ni se a lawmawm ang.

Aizawl khawpuia leh ruihhlo

Mizoram Board of School Education (MBSE)-in HSLC Examination 2023 result a tihchhuahah sikul ṭhen hrang hrang zingah deficit school zirlaite 92.18% pass-in an pass percentage a sang ber a, sorkar sikul zirlaite pass percentage hniam berin 58.12% a ni. 
Kan zirna tih­hmasawn thu kan sawi ṭhin a, rawtna hrang hrang a awmin mithiam kan tihte pawh an rawtna a inang vek lo. Kan zirna hian tihhmasawn a ma­mawh tih kan hre ṭheuh a, chutihlaiin kan sorkar sikul berte'n result an nei ṭha lo a nih chuan sorkar sikul aṭangin siam ṭhat hna hi sorkar hian a ṭan a ṭul hle a ni. 
Zirtirtu lam insawifiahna tur chiang sa chu sorkar sikulah chuan zirlai zinga a thiam thiam lak theih a ni lo a, zirlai an hmuh ang ang an admit a ngai a, a thiam lo deuhte luh khawmna ang pawhin a sawi theih ang. Hei vang hian zirlai zingah hlawhtling ta lo an lo tam deuh pawh hi a mak vak lo a, chutihlaiin hei hi kan hriatthiampui lutuk chuan sorkar sikul hi pass tlemna sikul an ni reng mai ang tih a hlauhawm khawp mai. 
Sikul zinga a tiṭha ber hi deficit school an ni tlat mai a, hei hi sorkar sikul lamin chonaah ngai se a ṭha hle ang. Sorkar hnuaia awm ve tho anga sawi theih deficit school hi chuan inawpna hranpa deuh a nei a, chumite chu an ṭang hle tih a chiang a, zirlai an neih ṭhat piah lamah zirlai ṭha hip thei turin an lo tiṭha ṭhang tawh a, he dinhmun hi sorkar sikul an nih vanga an thlen theih lohna tur a awm dawn em ni?

Sorkar sikul leh HSLC result

All NGO Coordination Committee hruaitute chuan Union Home Minister leh Union Law Minister bakah All India Congress Committee (AICC) hruaitu Rahul Gandhi-te chu Manipur-a buaina chhuak chungchangah tun hnai khan New Delhi-ah an kawm.

Mizoramah hian pawl hrang hrang a tam hle a, heng zingah hian pawl lian bik leh a ram pum huap zo zawk pawl an awm a, chu mite intelkhawmna All NGO Coordination Committee hian ram leh hnam tan hun pawimawhah hna ṭangkai tak tak an lo thawk tawh ṭhin a, an ṭangkai hle a ni.
Tun hnaia Manipur-a buaina chhuak hian Mizoram hi thui tak a nghawng tel a, Zofate tum bik an nih avang leh nasa taka an tawrh avangin Mizoram aṭanga kan au chhuak hi kan tih tur dik tak a ni. Kan pawl hruaitute'n sorkar mi pawimawh bikte an han kawm pawh hi a inhmeh a, an thawhrimna hian rah ṭha tak chhuah se a ṭha khawp mai.
Heng bakah hian Mizo mipuite'n kan zah rawn Mizoram Kohhran Hruaitute Committee (MKHC) a la awm bawk a, MKHC pawh hi a ṭul huna che chhuak mai ṭhin, ram leh hnam bakah sakhaw himna atana thawk ṭhin an ni a, Mizoram tan an thawhhlawk hle a ni.
Chhan hrang hrang avangin thil ṭhenkhatah ngaihdan inang lo leh inhnialnate awm ṭhin bawk mah se, ram leh hnam chhan a ngaih chuan kan aiawh pawl hrang hrangte an pen chhuak ṭhin a, hetiang pawl zahawm tak kan nei hi Mizoram kan vannei hle a ni.

NGO kan neihte an ṭangkai

Mizoram sorkarin traffic jam tihziaawmna atana a duan, Parking House Support Scheme (PAHOSS) hnuaiah mi 140 hnenah 1st instalment cheng nuai 890 pek chhuah a ni a, mi 47 hnenah 2nd instalment cheng nuai 200.60 pek tawh niin final instalment mi 11 hnenah cheng nuai 34.20 pek tawh a ni. Hetihlai hian PAHOSS sum cheng nuai 4,987 chu K-deposit ah dah mêk a ni. 
Sorkar rua­hman­na hi ngun taka thlir chuan traffic jam tihziaawmna tur a ni a, a hmingah pawh parking tih a awm a, tuna kan hman dan nen erawh a inpersan deuh niin a lang. PAHOSS sum latute hian garage an siam a ni ber a, zan lama lirthei hunna atan an hmang tlangpui a, chhun lama lirthei park/ dah zawk zawkna tur anga hmang an tam lo hle.
 Sum tam tak sengin mipui nawlpui hman tur vantlang parking an siam dâwn emaw kan ti a, tunah hi chuan mimal garage leh mimal sum lakluh theihna tur lirthei dahna siam man sorkarin a tumsak a ni ta deuh ber. Sorkar hian revenue model ṭha tak ngaihtuahin PAHOSS sum dawngtute hian sorkara sum an lek lêt theihna dan tur tal lo duang se a ṭhat tehlul nen, tunah hi chuan mimal in hmunah garage sakna atan sorkarin sum tam tak a thlawnin a pe a, lirthei dahtuten a dah man an pek hi sorkarin chan a nei ve lo niin a lang. 
Mipui vantlang sum tam tham hman dâwn hi chuan ngun taka ngaihtuah a, mithiamte rawn chunga kalpui a ṭha hle a, sum lama harsatna tawk nasa tak Mizoram sorkar sum kan hmanna lian tham PAHOSS kal dan hi chu ngaihtuah ṭhat leh theih ni se a duhawm hle a ni.

PAHOSS leh Mizoram sum

Mizoram Chief Minister chuan ṭhenawm ram leh state buai avanga Zo hnahthlakte tuamhlawm a ngaih avanga lungrual taka mi hrâng hrangin thâ an thawh chu lawmawm a tih thu a sawi a, "Harsatna hrang hrang tawhte hi tumruhna nen hmachhawnin, Mizoram hi ram nuam leh entawntlak, economy chak takah a siam theih a ni tih hre rengin, mahni zawn ṭheuha tih tur leh tih theihte ṭha­hnemngai taka thawh a pawimawh," a ti. 
Kan ram economy dinhmun siamṭhat hi a pawimawh a ni mai lo a, a ṭulin a ṭul a ni. Kan ramah hian hmasawnna hna thawh chu sawi loh ei leh bar zawnna ringawt pawh kan harsa a, economy siam ṭha tur khawpa hmalakna lian a awm hleithei lo a, kan ram dinhmun hi state dang nena khaikhin pawhin a la hniam hle a ni. 
Hetihlai hian sorkar project neih flagship policy, cheng vaibelchhe tam tak senna SEDP-te chu a sum thawk chhuak lo zawngin a pawisa fai a sem tawp a ni ber a, tuna 'family oriented' tia pawisa faia sem hi chuan state economy chawi kanna a kawk lo a, sorkar sum hlawm chhuahna lian bera pawisa thei sem tawp mai hi chu economy chawi kan tumnaah economist-ten an pawm thei lo ang. 
Kan sorkar hian economy chawi kanna turin mau/rua a buaipui bawk a, sum tam tak a seng tawh a, chutihlaiin sum thawh chhuah tih tham a la nei lo chu a ni ber. Kan sum thawk chhuaktu tur mau/ rua chu a kalpui dan tur ber pawh hriatthiam a la harsa a, sorkar kum li a lian tawh hnuah pawh mau/rua kan kalpui dan tur leh economy a chawi kan theih dan tur hi hriatthiam a la harsa hle. 
Kan Chief Minister-in Mizoram hi economy chak taka siam theih a nih thu a sawi hi a dik a, chutihlaiin a 'theih' hi a taka thlentir tura ruahmanna fel leh awmze nei a ngai a, tuna kan sum neih chhun chhun kan hman kual dan en hi chuan economy chak tak kan la nei mai dâwnin a lang lo.

Economy chawi kan leh CM

Mizorama lui hrang hrangte humhalhna atana Committee on Draft Mizoram Protection Bill hnuaia, The Mizoram (Protection of Rivers) Bill, 2023 duan chhin (draft bill) chu tun hnai khan Deputy Chief Minister hoin an thlir a, "Mihring kan lo pung chho zel angin tui mamawhna pawh a sang chho ve zel a, mahse hetih rualin kan tuihnate'n kiam lam a pan zel si avangin nasa leh zuala kan luite hi hum­halh a ngai," tiin Deputy Chief Minis­ter chuan a sawi. 
Mizoramah hian dan ṭha tak tak a awm rualin dan ṭha tawk lo leh dan hnawksak takte pawh a awm ṭhin a. Heng dan kan neih zingah hian zawm hlawh lo leh kankawh ṭhat lohte pawh a awm a, ṭha taka kenkawhte pawh a awm bawk. Tuna dan duan chhin hi a chhung thu hre ve thei lo mah ila dan pawimawh tak, kan ram hmalam hun nghawng thei dan a nih avangin a ngaihtuahtu leh a dan duangtu lam hian uluk leh ṭha taka an thawh a ngai hle a ni. 
Tunlaia Mizoramin harsatna a tawh chu tui a tlem hi a ni a, kan lui tuite a kang zo mai ang tih hlauhawm khawpin lui tam takah tui a kangchat titih tawh a, lui tam zawkah tun hma aiin tui a tlem hle a ni. Kan ram kan humhalh ṭhat tawk loh avang te, ramngaw kan suat nasat avang leh lui hnar humhalh nachang kan hriat tlai avangin tunah hian kan ramin a tuar mek a, a pawi khawp mai. 
Hetihlai hian dan ṭha tak nena lui hi kan humhalh leh thei a nih chuan tunah hian chhan tlak a la awm a, kan luite hi kan humhalh ṭhat chuan thil ṭha tam tak a thlen dawn a, in tur leh hman tur tui tam zawk kan nei dawn ni mai loin luia cheng nungcha tam zawk kan nei thei ang a, ram nuam zawk kan neih theih phah i beisei ang u.

Lui humhalhna dan

Mizoram Rajya Sabha MP chuan tun hnai khan Prime Minister hnenah memorandum a thehlut a, Manipur-a thil thlengte chhuitu tur Kristian MP-te telna Joint Parliamentary Team din turin a ngen a; memorandum a thehluhah hian, May 3, 2023 aṭanga tun thlengin Manipur-ah Kristian biak-in 42 aia tlem lo tih chhiat a nih tawh thu a tarlang a. Tribal-te biak-in mai ni loin Meitei Kristian biak-in pawh tihchhiat a nih thu a tarlang tel. 
Tun hnaia Ma­nipur-a Meitei leh Zohnahthlakte inkara buaina chhuakah Mizoram sorkar hruaitu lamin pa chan changin hma an la ṭha hle a, MP kan neihte pawhin an theihna zawn zawnah ṭan an la nasa a, a lawmawm hle a ni. Harsatna hian Manipur lama Zohnahthlakte a phuar khawm mai ni loin Mizoram lamah pawh inunauna a siam chho mêk a, sorkar chet lâk dan pawhin fak a hlawh a, tlâwmngai pawl leh mimalte pawhin an thawh hlawk tlâng viau a ni. 
Hetihlai hian Meitei leh Zohnahthlakte inkara buaina anga lang ni si hi Kristian biak-in lamin a tuar chat chat mai hi awmze nei taka duan lawk a ang hle mai a, hei hi chhui chian a ngai takzet a ni. Meitei hnam hi Hindu an ni tlangpui a, buaina chhuah ni aṭanga Kristian biak-in an bei leh a hnam pawh thliar loa biak-in zelin beih a tawh tâk avang hian a phena thil awm nia lang hi hai chhuah a ṭha hle a ni. 
Rajya Sabha MP-in a tih tur dik tak tia hma a la nghal hi a lawmawm a, he buaina hi uluk zawka chhui a, hrem ngai hrem a, thil awm dan ril zawka inphum nia lang hi hai chhuah a ṭha khawp mai.

Manipur buaina leh sakhuana

Two wheeler taxi hmanga ruihhlo sem kual ṭhin an awm nia hriain Central YMA hruaitute chuan, he thil hi an ngaimawh thu Transport Minister an sawipui a, two wheeler taxi khalhtute zingah hemi kawnga awareness campaign neih an rel a, hetiang ti man; chhuahte chu an permit cancel thlenga hmalak a ṭul hial mai thei, tih an sawi.
Aizawl khawpuiah hian a duh leh pawisa nei tan chuan zu leh ruihhlo dang hi mahni chenna ina deliver-tir theih hi an awm thluah niin an sawi a, heng zingah hian two wheeler taxi a tel a nih chuan a zia lo hle a ni. Mipuite tana rawngbawltu turte'n mipui pawi sawina ruihhlo an sem kual ṭhin a nih chuan, dan anga hrem an phu hle a ni.
Zu kan khap bur chung hian zu lei tur a awm reng a, a quality a ṭhat loh bakah a to deuh e, tih lohah chuan a nei tan chuan a supply lam hi chu a chatlak lo niin an sawi hial. Heng zu pek kualna atan hian two wheeler hi an hmang nasa a, thuneitu lam tan lirthei tlan pangngai tidinga lo dap chiam hi a remchan loh dan a tam a, chutihlaiin kan ram dinhmun en hi chuan a khát tawka inendik hi chu a ṭul hle a ni.
Kan ram dinhmun chhe tawh tak tichhe zual theitu ruihhloa sumdawnna thilah vantlang rawngbawla eizawngtute an lo tel ve a nih chuan a inhmeh lo hle a, anmahni two wheeler taxi neitu pawlte hlei hlei hian an ngaimawhin a rinawm a, anni lam pawh lo inzawng chhuak se a ṭha hle ang.