Nuai 100 chuang ziah ralah thubuai ziak lut turin CM leh Dy CM phût

Mizoram Pradesh Youth Congress Committee (MPYCC) chuan nimin khan an president Laltawnlianate chenna inah thuthar theh­darhtute kawmin, Assembly speaker Lalrinliana Sailo-in USA-a dy. chief minister Tawnluia department chan pakhat hnuaia cheng 100 chuang hnathawhna awm loa ziahbo a nih thu a sawi chungchang chhui chiang turin Chief Minister leh Dy. Chief Minister an phût thu an sawi.

MPYCC president Laltawn­liana chuan, Assembly Speaker meuhin eirukna chungchang a sawi chu thu tling a nih thu sawiin, "Rang takin kan sorkar hian action a la ang a, thil tidik lotu chu a chhuichhuah vat kan rin avangin engmah kan sawi lawk duh lo. Amaherawhchu, vawiin ni thlengin engmah hmalakna awma kan hriat loh avangin kan rawn ṭawng chhuak ve ta chauh a ni. Chiang taka eirukna awm nia langah pawh kan sorkar hian hmalak a tum lo hi nâ kan ti a, hetiang thil chiang pawh a chhuichhuak ngam lo a nih chuan sorkar zel tlakah kan ngai lo," a ti.

Lalrinliana Sailo-in Dy. CM department chan hnuaiah dik lo taka cheng nuai 100 chuang hnathawh awm lova ziah ral a awm tih a hriat thu Chief Minister Zoramthanga leh Dy. CM Tawnluiate thutdun lai ngeia a hrilh thu leh an department chan en uluk a tul thu a hrilh hial thu a sawina video ngei, mitin hmuh theiha Youtube-a tlangzarh nia sawiin Laltawnlian chuan, "Sorkar tan a mualpho thlak kan tiin pawi kan ti hle a ni," a ti a, Speaker thusawiin ngaihven a hlawh lo hian Zoramthanga kaihhruaiin eirukna a ngai pawimawh lo tih a tihchian thu a sawi.

MPYCC chuan Dy. CM department chan pakhat hnuaia mipui sum cheng nuai 100 chuang lai hmanna awm loa ziah ral chu an ngai thu tak hle tih sawiin, "Assembly Speaker meuhin he cheng nuai 100 chuang bo hi a ngaih thutak em em lai a, MNF sorkar hian chhui zui leh thubuai ziah luh tumna tun thlenga a nei miah lo leh Speaker ngei pawh thil awm dan zawt chiang tura hma lak zuina an neih awm hriat tur a la awm miah lo hi; MPYCC chuan mak kan tih rualin, Pu Zoramthanga kaihhruai dan nen a inhmeh tawk hleah kan ngai thung," an ti.

Mipui sum cheng nuai 100 chuang hmanna awm loa ziah ral nia lang mêk hi kan thiam dan ang angin kan chhui zui dawn nge, he eirukna tenawm tak hi a rang thei ang berin MNF sorkar hian an chhui zui dawn tih hi Chief Minister leh Dy. CM an zawh thu sawiin MPYCC chuan, "Hun rei kan pek theih tawh loh tur thu kan hriattir nghal," an ti a, chhui a nih loh chuan a ṭul anga hma an lak tur thu an sawi.