KHAWTHLIR

Thisen pe

KṬP, Rangvamual Branch chuan nimin khan thisen pek an huaihawt a, Synod Hospital tan thisen unit 19 an pe a, petute mipa 15 leh hmeichhia pali an ni. MNF ṭhalai, Champhai South leh Champhai North pawhin nimin khan Remna Ni pualin Champhai District Hospital-ah thisen unit 48 an pe a, petute mipa 41 leh hmeichhia pasarih an ni.

Mi 3 tuiah tla

Nimin chawhma dar 10 vel khan Kawlchaw West balu kàiah mi pathum - Andrew Lalramluahpuia (15) s/o C Biakchhuana, C Lalduatsanga (14) s/o Liankhuma leh Vanhmunropuia (14) s/o Lalnghakliana, Lawngtlai College Veng vekte chu Chhimtuipui luiah an tla. Vanhmunropuia chu chhan hman a ni lo a, nimin tlai thleng khan hmuh a la ni lo. Andrew Lalramluahpuia leh C Lalduatsanga te erawh chu chhan chhuah hman an ni.

Minister-in hmanpui

Minister K Lalrinliana chuan nimin khan Kolasib District Auto Rickshaw Association-in Kolasib Sport Stadium-a District Sport Meet an buatsaih a hmanpui. Sport Meet-ah hian Lungdai, Kawnpui, Bairabi, Bilkhawthlir leh Kolasib aṭangin auto-rickshaw khalhtute an tel a ni.

Rangva vailiam

Lengteng bialtu MLA Dr L Thangmawia chuan June 29, Nilaini khan Turial Airfield-a CDAR Complex atangin Hlunsanga Malsawmna Scheme hnuai aṭanga a bial chhunga rangva inchung nei lo chhungkaw 45-te hnena rangva sem tur a vai liam. Rangva hi chhungkaw khatah bundle li zel pek tur a ni. Hlunsanga (L), Kawlkulh hi Lengteng bial aṭanga Zoram zalenna puanna a hming ziak awm chhun niin, a hming chawiin in chung rangva nei lo leh chhe tawhte hnenah rangva hi sem a ni a, he scheme hi 2025 thleng kalpui a ni dawn.

Chetsualnaah thi

June 28, Nilaini zan dar 8 vel khan pick-up brake fail nia hriatin Dawrpui Vengthara Aizawl West College bulah lirthei eng emaw zat a sû. Pick-up sut zinga mi scooty-a chuang Zorinsanga, Khumtung khua, Chawnpui Venga khawsa mek a thi. Mi dang hliam na lutuk an awm lo nia thu dawn a ni.