Remna Ni 2023 pualin photo exhibition

Information & Public Relations department, Mizoram Journalist Association leh Mizo Photographer’s Society-te chuan Remna Ni (June 30) pualin nimin khan Vanapa Hall-ah Photo Exhibition an buatsaih a, IPR minister Lalruatkima’n a hawng.

Photo Exhibition hawnna inkhawm hi IPR director C Lalnunkima'n a kaihruai a; IPR Minister chuan, Mizoram chu kum tam tak a buai hnuah June 30, 1986-ah sorkar laipui leh hnam pasalṭhate zarah remna thuthlung ziah a nih tak thu sawiin, "Kum 20 chuang rambuai ni ṭhin kha remna leh muanna vawnghim ṭha ber a ni ta hi mipuite zar a ni," a ti.

Lalruatkima chuan, kumin Remna Ni lawmna atana thil chi hrang hrang buatsaih chu hnam tin inpumkhatna leh inlungrualna thlentu ni se a duh thu a sawi a; mimal, chhungkua leh khawtlanga inrem lo leh inrem thei lote tan remna dár vuakna ní atan hmang ṭheuh turin mipui a ngen.

Thlalak chu hnam ro hlu leh tih dan phungte vawnghimtu ṭha tak a ni tih sawiin Lalruatkima chuan, "Hmânlai thil hlu tak tak pho chhuaka chhawm nung zeltu a ni," a ti a; mihringte chu thil siamte nen lungrual taka chêng ho tur an ni tih hre reng a, inrem taka nungho turin kal khawmte a chah bawk.