Champhaiah Horti Fair & Flower Show

Horticulture department leh Champhai District Florist Association chuan nimin khan Champhai New Market (CHANEM)-ah pangpar phochhuahna leh zawrhna, Horti Fair & Flower Show an buatsaih a, minister of state TJ Lalnuntluanga'n a hawng.

Horti Fair & Flower Show hawnna inkhawm hi district horticulture officer B Lalzarzova'n a kaihruai a, category pali - Flower Arrangement, Pot Flower, House Plant leh Bonsai te awmin, mi 91 an tel. Category hrang hranga ti ṭhate hnenah lawmman sem a ni a; pakhatnain Rs 2,000, pahnihnain Rs 1,500 leh pathumnain Rs 1,000 an dawng a, tel zawng zawngin Rs 500 ṭheuh an dawng bawk.

Minister TJ Lalnuntluanga chuan, pangpar khàwi chu hlimna a nih bakah sum leh pai deh chhuah theihna a nih thu sawiin, "Tun aia nasaa hmalak a nih chuan ram sum leh pai dinhmun thlengin a tiṭha thei. Khualzin hîp leh thlen kawnga hmalakna, Swadesh Darshan 2.0 hnuaia hmalakna turin Champhai leh Aizawl district-te thlan a ni a, mithiamte'n Champhai tlawha zirchiannate hmun hnih/thum velah an nei tawh," a ti.

Minister chuan, tun aṭanga kum 20-30 thlirin Champhai Zotlang hmun hluiah Botanical Garden, Nature Learning Centre leh Interpretation Centre din mek a nih thu a sawi a; rawtna leh finchhuah duh neite tan a inhawn reng thu a sawi bawk.

Inkhawmah hian Champhai DC James Lalrinchhana pawhin thu sawiin, khuarel mawinate ngaihlua duat thiam turin Champhai district mipui a chah.