MNF hi Mizo hnam tana din a ni - MNYF President

Mizo National Youth Front (MNYF) president Dr L Thangmawia, MLA chuan MNF chu Mizo hnam tana din a nih thu leh MNF president Zoramthanga chu Mizoramin political party leader a neih zingah tluk an la awm loh thu a sawi.

MNYF President hian nimina Kolasib Diakkawn Hall-a Kolasib Block MNYF inkhawmpui a hmanpuinaah thu sawiin, "Mizoramah political party tam tak a lo ding tawh a, Mizo hnam tâna din awm chhun chu MNF chauh a la ni. India rama political party tam takin kum 60 an tlin theih loh laia MNF-in kum 60 chuanga upa a nih theih chhan hi mi chak lo leh tling lote hruai ṭhintu Pathian vang a ni. Mizote hnama min dintu hian tum neiin min kaihruai a, a mite enkawl tur pawhin hruaitu ropui tak tak min pe ṭhin," a ti.

L Thangmawia chuan, party dangte aiin MNF-in hruaitu an nei ṭha nia sawiin, "MNF founder president Pu Laldenga kan hria a, kan ram leh hnam tana a beih nasatzia pawh kan hria ang. Tunah Pu Zoramthanga min pe leh a, hruaitu ṭha chuan vision ṭha a nei tur a ni. Leader ṭha ni tur chuan mi ho khàwm thiam nih a ngai leh a, party dang aṭanga an hruaitu lawk apiang la lut thei hruaitu kan nei hi MNF vanneihna a ni," a ti a; political party leader Mizoramin a neih zingah MNF President tluk an la awm lo niin a sawi.

MNYF thuchhuah chuan, inkhawmah hian uaptu atana an sawm MNF adviser K Lalrinliana, minister-in an party-ah mi 144 a lawm lut niin an tarlang.