Remna Ni pual thing phun leh faina hnatlang

Remna Ni, June 30 pualin nimin khan district hrang hrangah faina hnatlang leh thing phun hnatlang huaihawt a ni a, mi eng emaw zat an thawk chhuak.

Lungleiah chuan UDPA department hmalaknain Pukpui Centenary Park, Chanmari-a Lunglei Park leh Lunglawna Three Gate-ahte faina hnatlang huaihawt a ni a; BSF leh Assam Rifles sipai te, Baptist Higher Secondary School, Lunglei Higher Secondary School leh Liantawna High School zirlai te, Clean Lunglei volunteer-te leh UDPA department thawktute an tel. Kal khawmte chuan remna leh faina chungchanga thutiam an chham rual a ni.

Kolasib-ah chuan Project Veng YMA Hall-ah EFCC department hmalaknain Remna Ni pual thing phun hnatlang huaihawt a ni a, district bawrhsap John LT Sanga'n a hmanpui. Hnatlangah hian sorkar hotu te, YMA sub-headquarters, MUP, MHIP, MZP, MSU leh Ex-MNA hruaitute an tel.

Mamitah pawh Remna Ni pualin thing phun hnatlang huaihawt a ni a, Mamita sorkar hotute leh District Committee on Celebration of Remna Ni member-te'n Berawchal, Herhse, Khuangthli, Thlado leh Lenhmui ṭiakte an phun a ni.