Kolasib MJA-in kawngpui chhia an enfiah : "A ṭul chuan court-a kal kan hreh lo ang"

MJA, Kolasib district member-te chuan nimin khan Mizoram châk lâkna kawngpui (National Highway), Kolasib district chhung hmun tam taka lirthei tana zawh harsa khawpa chhiate a hmunah an enfiah. Kolasib MJA president Andrew VL Auva chuan, mipui tan a ṭul a nih chuan court-a kal an hreh loh thu a sawi.

Kolasib MJA-te chuan, an district chhungah NH kawngpui chu Vairengte leh Bilkhawthlir inkar leh, Kolasib leh Kawnpui inkarah a chhe nasa zual tih tarlangin, "Kawnpui lama kawng chhiat zualna Seṭhàwnah chuan kawngpui chhuat feet khat leh a chanve aia thûka khuar a tam hle. Thu dawn danin, ruah a sûrin kawng a diak bakah a nâl a, mihring tan pawha kaltlang harsa khawpa a awm ṭhin vangin darkar 3 dáwn lirthei a tangkhan cháng pawh a awm ṭhin," an ti.

MJA-te tarlan danin, NH kawngte chu NHIDCL hnuaia contractor Ratna Infrastructure enkawl a nih laiin, nimin aṭang khan Central PWD hnuaia contractor Sanjit Baruah, Guwahati-in kawng sir tihfai leh kawng khuar (pot hole) hnawh leh hna tênau dangte an thawk.

Kawng khuar hnawh leh kawng sir tihfaina atan hian contract agreement an siam loh thu leh hnathawh azirin pawisa an inpek ṭhin thu NHIDCL hotute'n an sawi. NHIDCL-in lung an pe a, contractor-in labour ngaihtuahin pot hole hnawh khah hna an thawk a ni.

NHIDCL hotute chuan, kawng siam turin contractor Ratna Infrastructure an chhawr reng a, mahse, kumin fûr, thla ruk chhung atan Sanjit Baruah kutah Vairengte-Bilkhawthlir (km. 28) leh Kolasib Leitan-Kawnpui (km. 23)-te an dah thu MJA member-te an hrilh.

MJA-in an tlawh lai hian kawng chhiat zualna Seṭhawnah thawktu (labour) 18 an awm a, JCB pakhat a awm. Tuihâwk luankawr (side drain)-ah leivûng tharlám tam tak dah a ni a, chu'ngte chu kawngpuia tui a luan chhan leh kawng a chhiat chak chhan nia an hriat thu MJA-te chuan an tarlang.

Kolasib MJA-te chuan, Bilkhawthlir Kharzawl thlen hma aṭanga Kolasib Leitan inkar (km. 25) leh Kawnpui Bazar aṭanga Khamrang inkar pawh hmun tam takah a khuar thu an tarlang bawk.

Kolasib district MJA president Andrew VL Auva chuan, Mizoram châk lâkna kawngpui ber enkawl dan chu a fel lo tih sawiin, "Contract mumal tak pawh awm loa kawngpui pawimawh enkawl a ni hi Mizo mipui ang pawha kan ṭanrual hun tak a ni. Tunah fûr a ni a, kan mamawh zawng zawng lâk luhna kawngpui hi sorkarin ngai pawimawh zual se. Mipui tana hmalakna kawngah a ṭul a nih chuan MJA pawh court-a kal kan hreh ka ring lo," a ti