Remna Ni pualin police-te'n thisen pe
Mizoram Police-te chuan kumina Remna Ni, June 30 pualin district hrang hrangah thisen pek runpui an huaihawt a, hriat theih chinah tun kar chhungin thisen unit 112 an pe tawh.
Aizawl Traffic Police chuan June 26-27 2023 chhung khan Civil Hospital, Aizawl Blood Bank-ah thisen unit 16 an pe a, Aizawl District Police-te'n June 28 khan thisen unit 18 an pe leh bawk.
Champhai Police-te chuan nimin khan Champhai District Hospital Blood Bank-ah thisen unit 16 an pe a, petute mipa 15 leh hmeichhia pakhat an ni. Thisen pek rûnpui an huaihawt hi minister of state TJ Lalnuntluanga, Champhai South bialtu MLA-in a hmanpui.
Lunglei Police-te'n June 28 khan Lunglei SP office conference hall-ah thisen pek an huaihawt a, District Police, 2nd MAP, CID (SB) leh Fire & Emergency Services aṭangin mi 21-in Christian Hospital, Serkawn tan thisen an pe.
June 28 vek khan Khawzawl SP office chuan DC office, 2nd IR leh YMA Sub-Headquarters YMA-te nen ṭanghoin Remna Ni puala thisen pek rûnpui an buatsaih a, Champhai District Hospital tan thisen unit 41 an pe a ni.