Ngentiang damdawi-in sak thar hawng

Health & Family Welfare minister Dr R Lalthangliana chuan nimin khan Ngentiang damdawi-in (primary health centre) sak thar a hawng. Ngentiang PHC hi NABARD (RIDF XXVI 2020-21) aṭanga hmuh cheng nuai 266.5 sênga sak a ni.

Ngentiang PHC building satu contractor chu C Lalrengliana, Aizawl a ni a, February 2021-ah sak ṭan niin, June 6, 2023 khan sak zawh a ni. Mipa ward, hmeichhe ward, clinic, dressing room, x-ray room, store room, preparation room, laboratory, waiting area, minor operation theatre, casualty, office, main centre leh main hall-te a awm.

Health Minister chuan, tun hnai kum nga chhungin community health centre sak thar 20 chuang a awm thu leh hawn mai theih tura sak zawh tawh a la awm nual thu a sawi a, "Mizoram hian sub-centre 375, PHC 61 leh CHC pakua kan nei a, kan sub-centre zawng zawng hi health & wellness centre-ah kan hlâng kai vek tawh," a ti.

Covid-19 léng leh vawk pûl hriin Mizoram a nuai tih sawiin Dr R Lalthangliana chuan, "Ramri buai leh Myanmar, Bangladesh leh Manipur aṭanga unau râltlânte kan theih tawkin kan dawngsawng bawk. Heti chunga hmasawnna tam tak kawng hrang hranga kalpui zel a ni hi a lawmawmin a mak ka ti hial zawk," a ti a; Ngentiang damdawi-in chu Ngentiang leh a chhehvel khaw mipuiin ṭangkai taka an hman a beisei thu a sawi.

Damdawi-in hawnna inkhawm hi Health Services joint director Dr Chawngthanchhunga'n a kaihruai a; bialtu MLA Lalrinawma, minister pawhin thu sawiin, "Damdawi-in kan hawn thar neitu dik tak chu mipui kan ni a, felfai leh duat taka enkawl turin ka ngen che u a ni," a ti.