Premier League champion lai Manchester City-in champion nawn turin an ṭha tawk tih an lantir a, Pathianni zan khan Stamford Bridge-ah mualneitu Chelsea chu 2-0 in an hneh.
Euro 2024 best player Rodri tel lo chungin Man City tan Erling Haaland leh Mateo Kovacic ten goal an khung a, manager thar Enzo Maresca hnuaia khel Blues-in a chhanletna an nei lo.
Champion thei squad
Nipui bazarah City buai deuhin lang mah se inelna ṭan meuh chuan Ederson a lungawi tawh a, Brazilian goalkeeper hmaah Josko Gvardiol, Ruben Dias leh Manuel Akanji te an intlar ṭhap. Bench-ah Nathan Ake, John Stones leh Kyle Walker te an dah a, thei an squad ṭhat zia a lang.
Rodri awm loh hlanin Kovacic chu mawhphurhna latu a ni a, Croatian midfielder hi Rico Lewis nen an inkawp. Tlarhmaah goal khung khawl Erling Haaland a mal tlat a, Norwegian striker hian Euro 2024 a khelh loh avangin nipui chawlhah hahdamna hun ṭha a nei.
Haaland hnungah player thar Savinho, Kevin De Bruyne, Bernardo Silva leh Jeremy Doku ten an awm a; bench-ah season liam ta player of the season Phil Foden leh Jack Grealish te an awm a, champion thei squad chu an kawl chiang a ni.
Goal khung khawl Haaland
City-in mikhualna hmunah inkhel an thunun nghal a, Brazilian winger Savinho pawh a chevel a dik.
Minute 18-na lekah Jeremy Doku ball pekluh chu Bernardo Silva-a'n khawih per zeuhin box chhunga awm Haaland keah tak a tla. Haaland hi Marc Cucurella-a'n veng mah se a buai lo - goal hmahruai a khung.
Spanish defender Cucurella hian Euro 2024 champion lawmnaah, "Cucurella hlauh vangin Haaland a khur a tia," an intawn meuh chuan, a vawtuin ek a cheh tih ang chauh a ni.
Goal luh hnuah City bawk an chungnung a, Chelsea tlarhnung a pherh thung. KDB-a'n box pawn aṭangin goal zawnah a pet lo a, Doku-a'n pet ṭha mah se Chelsea keeper Robert Sanchez-a'n a dang ṭha thung.
Sanchez hi a khel ṭha a, second half-ah pawh Haaland-a goal khung tur ṭha takin a dang. Inkhel chawhnu lamah Blues an rawn insiamṭha a, City-in goal venhim hna an thawh a ṭul ta thung.
Pep Guardiola hote point hloh thei dinhmunah a ding a, mahse minute 84-naah Kovacic-a'n ṭha taka khalh lutin box pawn aṭangin kawh zetin a club hlui lamah a khung a, a goal khung a lawm duh lo.
Croatian midfielder hian goal khung turin Enzo Fernandes leh Moses Caicedo te a paltlang. Koavcic hi £25m-in Chelsea an hralh a, a thlakna tur an lakluh Enzo leh Caicedo man belhkhawm chu £221m daih a ni!
Blues an vanduai
Chelsea-in chak loin season bul an ṭan a, vanneih ṭum ni se point hlawh chhuak thei tur an ni. First half-ah Cole Palmer-a ball pet chu Ederson-a'n a man per a, Nicolas Jackson-a'n goal-ah chantir mah se offside vangin pawm a ni lo.
Jackson hi goal hmaah a hriam tawk lo a, second half-ah hnai tak aṭangin goalkeeper Ederson a pet per. Hei chauh hi a ni lo a, Chelsea hi penalty ni awm tak pek an ni lo.
Blues defender Malo Gusto chuan box chhungah Kovacic-a kut a pet per a, mualneitu lamin penalty ni ngei turah ngai mah se pek an ni lo. Handball dan tharah hian ball-in kut a per zawng zawngin hrem tur a ni lo a, tun ṭuma penalty an pek loh chhan hi an inhnaih lutuk avanga Kovacic a insa seng theih loh vang a ni.
Pep a lawm
Chelsea hian UCL final-a Man City an hneh hnuah Pep-a hote lakah hian match 10 chhung chak hmel an hmu ta lo. Chutihrualin thlirna danga thlir chuan season liam ta khan Stamford Bridge-ah 4-4 in an inhnehtawk a, City-in point hnih an hloh.
Inkhelh banah Pep-a chuan, "Ka naute theihna ka hria a, chutihrualin duhthusama training kan neih hman loh ngaihtuah chuan ka beisei phak bakin kan khel ṭha. Season liam ta khan Stamford Bridge-a kan chak zawh loh avangin tuna kan result hi, result ṭha a ni. Mahse, match 60 chuang khelh hmabak kan la nei a, hmasawn zel kan la ngai," tiin a sawi.
City boss chuan sawi chhunzawmin, "Keini bikah chuan statistics pawh in en fimkhur a ngai, Rodri tel lo pawhin kan chak. Kan team tan chuan Rodri hi a pawimawh takzet a, chuvangin a awm loh huna khel thei tur tawnhriat nei ṭha Kovacic kan kawl hi a pawimawh a ni a, a khel ṭha takzet," tiin Kovacic-a'n Rodri hmunruak a luah khat ṭhat thu a sawi.
