Zverev lakah Jannik Sinner dingchang

Inkhel hmuhnawm leh hautak tak maiah Jannik Sinner a ding chang - Italian tlangval hian Alexander Zverev chu 7-6(9), 5-7, 7-6(4) a hnehin Cincinnati Open final a in vaw kai.

Australian Open champion Sinner han season a hman ṭhat chhawm nun zel a tum a, hna erawh a awlsam lo hle - German tlangval hneh tur hian darkar thum leh minute sarih ngawt hun a mamawh.

Season kal laia ATP Tour title pali la tawh Sinner chuan, "Kumin chu boruak hrang hrang ka tawng hnem hle a, match hautak zet zet paltlang pawh ka nei, chung zingah chuan tun ṭum ami pawh hi a tel.

"Rilru paukhauh ringawt hi tennis huangah chuan a tawk zo lo, taksa a chak tel ve a ngai bawk. Zverev lak aṭang khan zirlai tam tak ka zir chhuak, hmasawn phah nan ka hman ngei ka beisei," tiin a sawi.

Semifinal lehlamah Frances Tiafoe chuan Holger Rune chu 4-6, 6-1, 7-6(4) in a hneh ve bawk a, tukin hian nomawi an inchuh dawn a ni - Tiafoe tan tennis a khelh china final a luhna lian leh ropui ber a ni hial.

Tennis season chawhnu lam a ni a, inelna lian zingah phei chuan US Open chiah hmabak an nei tawh. Cincinnati Open pawh hi US Open inbuatsaihna zinga mi a ni a, world number 1 Sinner tan a pawimawh hle.

Kar leh aṭangin New York khawpuiah US Open hi an khel dawn - Olympic champion a nih hnua a vawi khat nan Novak Djokovic chuan tournament a khelh a rinawm a, Cincinnati Open lamah beisei phak lo Carlos Alcaraz chuan insiamṭhat a tum bawk ang.