Sommer-a'n ram tana inkhelh a chawlhsan

Switzerland goalkeeper Yann Sommer-a'n nimin khan ram tana inkhelh a chawlhsan thu a puang. Kum 35 mi Sommer hian a club khelh mekna Inter Milan tana insawrbing a thlang.

FC Basel aṭanga inzir chhuak Sommer hian Borussia Monchengladbach-ah hming a chher a, Bayern Munich tan season khat a khelh hnuah kum 2023 khan Inter Milan a pan. Swiss keeper Sommer hian ram tan inelna hrang hrang under 16, 17, 19 leh 21-ah a te a khel vek a, senior team tan May 30, 2012 aṭangin a khel ṭan.

Sommer hian World Cup leh Euro C'ship vawi thum ve ve a khel a, match 94 khelin sulhnu ṭha tak a hnutchhiah. Ram tana inkhelh hnunun ber chu Euro 2024 kha a ni a, quarterfinal-ah England lakah penalty shootout hmangin an chak lo.

Inter Milan keeper Sommer-a'n ram tana inkhelh a chawlhsan takah chuan kum 26 mi Borussia Dortmund keeper Gregor Kobel tan hun ṭha a inher chhuakah a ngaih theih ang. Switzerland hian September thla hian UEFA Nations League-ah Denmark (Sept 5) leh Euro 2024 champion Spain (Sept 8) te an hmachhawn dawn a ni.