Felix hma hun a la chiang lo

Chelsea nena sawizawm hlawh mek, Atletico Madrid forward Joao Felix chungchangah he thu buatsaih a nih thleng hian thuchiang a la awm thei lo a, Madrid khaw club boss Diego Simeone chuan, "Hunin a la hril mai ang," a ti.

Simeone chuan, "Inhmuh angin Felix hian he hmun hi nuam a ti hle a, professional footballer kan beisei ang takin a awm - club tana a inpekna a danglam lo a, theihtawp chhuahin training a nei reng bawk.

"A hmaa inchhawp apiang ngaihtuah thei turin a inbuatsaih a, a ṭhiante nen an inel reng. Kan chhawr zel thei dawn em, tih chu hunin a hril ang chu," a ti a, nizan khan Atletico Madrid hian an league match hmasa ber khelin, Felix an chhawr leh chhawr loh a hriat hman loh.

Atletico hian tun nipui transfer-ah Chelsea an indawrpui nasa hle. Spanish club hian Blues midfielder Connor Gallagher chu la lut turin London club hi inremna an neihpui vek tawh a, mahse, an striker Samu Omorodion-a'n Chelsea a pan leh tak loh avangin Gallagher hi an la lut thei rih lo.

Madrid khaw club hian Felix hi Blues hnenah an hralh thei a nih chuan Gallagher hi an lak chhunzawm ve nghal mai a rinawm. Felix hian season hmasa kha Barcelona-ah loan-in a khel a, match 44-ah goal 10 khungin, assist vawi ruk a nei.

Chelsea-ah hian 2022-23 season kha loan-in a lo khel tawh a, match 20-ah goal li khungsakin, assist a nei lo a, Stamford Bridge a pan a nih pawhin a tlangnel nghal thei ang.