A chung berah Francesco Bagnaia

MotoGP champion vawi hnih ni tawh Francesco Bagnaia chuan Austrian Grand Prix-ah hnehna a chang a, a chak avang hian bike intlansiakna sang bera inumna huangah pawh hmahruaitu dinhmun a luah tel nghal.

Italian tlangval hian Inrinni khan Sprint Race-ah hnehna a chang a, intlansiak pangngaiah pahnihna aṭangin bul a ṭan thung. Lap hnihnaah Jorge Martin tlan pelin, championship lama a elpui hmaah a tlan thleng ta a ni.

Pathianni tlai Red Bull Ring-a intlansiakah hian Spanish rider Martin-a'n qualifying a tlan ṭha hle a, a hmasa ber aṭangin intlansiak pangngai pawh bul a ṭan, tlan ṭha viau mah se tun ṭum chu Bagnaia a dang zo lo.

Hnehna changtu Bagnaia hian tun season intlansiak an neih tawh aṭangin point 275 hmuin hma a hruai a, amah hnaih bertu Martin nen an inkarah point nga chauh a awm, dinhmun inthlak thei reng an la ni - pathumna chu Enea Bastianini a ni thung.

Kum 27 mi Bagnaia chuan, "Kan tlan chak em em a, khatiang tak maia intlansiak tir aṭanga a tawp thleng chak taka tlan theih mai kha chu ropui ka ti, kei leh Jorge kha kan tlan ṭha takzet a ni.

"Lap tinah khan ka elpui aia ṭha hreta tlan zel ka tum a, vawi leh khata kal fal emaw tlansan daih emaw theih a ni lo, lap hnuhnung ber thleng kha ka inthlahdah thei lo hrim hrim.

"Hnehna chan hi a hlu a, mimal a hlawhchhuah theih erawh a ni lo. Ka team leh academy lamin ka chak theih nan hian nasa takin min pui, an chungah thinlung takin lawmthu ka sawi," a ti.

Pahnihna dinhmun luahtu Martin chuan, "Pakhatna ni thei turin remchang ka nei a, a bul ka ṭanna pawh a dik hle. Ṭha taka tlan chunga pahnihna ka ni erawh ka ui hle, mahse tun ṭum atan chuan Bagnaia kha a ṭha zawk a ni," tiin a sawi.

Marc Marquez chu palinaah a thleng - MotoGP vawi ruk champion tawh hi qualifying lama tlan chak pathumna a ni a, intlansiak takah a tir lamah a che fuh lo, lap hmasa berah kawngpui hrulah tlan chhuakin a hnufual phah.

Kum 31 mi Marquez hi Sprint Race neih laiin a chesual bawk a, tlan ṭhat chang nei mah se a vanglai anga hnehna chan a harsat ta rih hle. Season kal laiah champion beiseina la nei mah se a tan kawng a hautak dawn tawh a ni.

Khawvela bike intlansiakna sang ber hi September 1, Pathianni tlai hian an tlan chhunzawm leh dawn. Ciudad del Motor de Aragon-ah Aragon Grand Prix an tlan leh ang.