
Real an chak zo lo - Mbappe a nil

France ram pawna league match a khelh hmasak berah Kylian Mbappe a 'nil' a, a club thar Real Madrid chu hnehna a chanpui zo lo - Real Mallorca nen 1-1 in an inhnehtawk a, Spanish champion-in league match hmasa berah an beisei result an hlawh chhuak thei lo.
Real hian UEFA Super Cup hmanga season bul ṭanin, kar hmasa lawk khan Europa League champion Atalanta chu 2-0 in an hneh. He inkhelah hian Mbappe pawhin goal a khung nghal a, tun season-a Real huphurhawm turzia chu media-ten hahipin an sawi.
Mahse, football hi khelmualah khelh a ni a, lehkha ziakah ṭha eng ang mah se, a nemnghettu chu 'thil tih' a nih a ngai. Real-in en maia team hlauhawm tak an nihna chu khelmualah an lantir thei lo a, point khatah lungawi an zir.
Real tan Rodrygo chuan goal hmahruai a khung a, "Eng zat tak khung belh ang maw?" tia zawhna a awm laiin, an khung belh lo a, Mallorca chuan Vedat Muriqi hmangin an khung zawk - hun a tawp meuh chuan 1-1 a ni a, Real defender Ferland Mendy chu red card pek a ni bawk.
Beisei bo
Real-in Atalanta lakah first half chhungin game hmuhnawm pho chhuak lo mah se, second half-a an game chu hmuhnawm a tling a, Mbappe, Vinicius Jr, Rodrygo leh Jude Bellingham te neitu team hi Mallorca tan dawl zawh chiah ngaih a ni lo.
Beisei ang ngeiin Real-in goal an khung nghal a, minute 13-naah Rodrygo a inlar a, Brazil tana a khelhpui ni bawk Vinicius-a backheel chu ṭha zeta a insiam rem hnuin goal kilah mawi zetin a thlawh lut.
Mahse, hei hi he inkhel bika Real lawm lai ber a ni zui - Atalanta lakah Mbappe-a'n goal khung nghal mah se, Mallorca khelmualah a vanneih zan a tawng lo a, chance nei mah se, a hun ṭha neih goal-ah a chantir thei lo.
Mbappe hian Bellingham-a siamsak ṭha zet chu uiawm takin post tihper nan a hmang a, uiawm taka a thlawh out bakah Mallorca keeper Dominik Greif chuan a kein ṭha zetin a dansak bawk.
An hming Mallorca
Real Mallorca-in Real ropuina hmaah zamral bik an tum lo a, an vanneih zan ni ngat se, point thum hmu thei tur zawk an ni hial - minute 53-naah Vedat Muriqi a inlar a, Dani Rodríguez-a corner chu kawh pawtin a tauh lut.
Madrid an hawihai a, mualneitu thawm a ṭha takzet thung. Real tan striker pasang leh tharum ngah Vedat Muriqi a hnawksak chhunzawm a, Kosovo international hian chakna goal khung theihna chance a neih chu uiawm takin a hlah zawk.
Bench aṭanga luhtir Antonio Sánchez lam hmaih a thiang lo. Spanish midfielder hi bench aṭanga luhtir a nih hnuah a khel ṭha a, a vanneih zan ni ngat se chuan Mallorca hi a chakpui hial ang.
A tawpah chuan Real-in point khata lungawi an zir a ṭul a, champion lai hi an match hmasa berah an chak zo lo nghal - Inrinni zan khan Barcelona erawh an lo chak tawh a, Catalan club hi Real result-ah Mallorca ai mahin an lawm hial a rinawm.
Mangṭha mangchhia
Mbappe-a'n ngaihven a hlawh zanah amah beiseitute beiseina a chhanglet thei lo a, Real superstar player rual kara langsar ber chu 6 ft 4 in-a sang Muriqi a ni - goal a khung bakah chance a nei nual a, amah vangin Mendy hnawhchhuah a ni bawk.
Madrid defender Ferland Mendyhi injury time-ah hlauhawm takin Muriqi lakah a che a, red card pek a ni. August 25, Pathianni zanah Real hian Real Valladolid an mikhual leh dawn a, Mbappe bawkin thlir rawn a hlawh leh ang.
Real boss Carlo Ancelotti tan player ṭha rual kawl chunga Mallorca hneh zawh loh a tlawm thlak a, Italian coach hian a player-te aṭangin eng chhuanlam mah ngaihthlak a duh dawn lo.
Ancelotti chuan, "Ka lawm lo takzet, hei aia ṭha zawk hian kan khel thei tih ka chiang a ni," a ti a, Barca leh Atletico Madrid telna league a nih miau avangin vawi khat tlawm pawizia a hrechiang.
