Tottenham-in Skipp hralh dawn

Premier League club Tottenham Hotspur chuan Leicester City-in an midfielder Oliver Skipp lei an dilna chu an pawm a, Premier League kai thar Foxex hian pound maktaduai 20 bawr vel Skipp-a manah hian an pe ang.

Kum 23 mi Skipp hian nimin khan medical a nei a, he thuziak i chhiar meuh chuan Foxes player a ni fel tawh ang. Nizan khan Leicester hian Spurs hi an mikhual a, he thu buatsaih a nih lai hian result kan hre hman lo.

Tottenham academy chhuak Skipp hian October 2018 khan Spurs tana a match hmasa ber a khel a, London club tan hian inelna hrang hrangah match 106 khelhsak hmanin, goal khat leh assist vawi hnih a nei.

Season hman zawh takah khan inelna hrang hrangah match 24 a khel a, Spurs tana a khelhpui ṭhin Harry Winks nen Foxes-ah an khel leh dawn tihna a ni. Premier League champion hlui Leicester hian tun nipuiah player pali an la lut tawh a, Skipp hi a pangana tur a ni.

Steve Cooper enkawlna hnuaia top flight league hmachhawn tur Foxes hian Skipp hmain Atalanta centre back Caleb Okoli (£13mtd), Chelsea midfielder Michael Golding (£5mtd), Fulham winger Bobby Decordova-Reid (free) leh Sporting Lisbon forward Abdul Fatawu (£14.4mtd) te an lo la lut tawh.