Chelsea-in Osimhen an duh

Nipui transfer-ah player la lut nual tawh mah se, Chelsea-in an mamawh tak an la nei lo - goal khung tur an mamawh! Blues hian Napoli striker Victor Osimhen chu Stamford Bridge-ah loan-a lakluh an tum a, kawng erawh a awlsam lo ang.

Nigerian forward hian Italian club hi chhuahsan a duh thu a sawi tawh a, mahse, Napoli lam hian chelh hram dan an ngaihtuah. Napoli sporting director Giovanni Manna chuan, "Victor hi kan player pawimawh leh hlu tak a ni a, a duh chu kan hria.

"Chutihrual chuan kan squad zahawmna hi kan vawnhim a ṭul a, keini chauh hi hetiang dinhmuna ding club pawh kan ni bik lo. Ni 10 lo awm turah hian eng nge thleng chu kan hria ang chu," a ti a, player chhuah duh chelh chu club tam tak tihdan a nih ve tho thu a sawi.

Manna chuan sawi zawmin, "Tun dinhmunah chuan thil sawi vak vak a rem rih lo. Osimhen-a aiawhte nen a ṭha thei ang bera thutlukna siam turin kan indawr mek," a ti. Napoli Sporting Director chuan, "Season hnih contract a la nei a, August 30 thlenga thil kan chingfel thei lo a nih chuan player nen kan indawr leh ang chu," a la ti chauh.

Kum 25 mi Osimhen hian season hman zawh takah khan Napoli tan inelna hrang hrangah match 32 khelin goal 17 a khung a, assist vawi li a nei.