Napoli-in Lukaku an hnaih

Serie A club Napoli chuan Chelsea-a hmun chang phak lo Romelu Lukaku lakchhuah ngei tumin London club hi an dawr a, an inrem hnai tawh niin khawthlang media-te chuan an tarlang - Napoli boss hi Chelsea coach hlui Antonio Conte a ni.

Italian coach hian Inter Milan-ah pawh Lukaku hi a lo chhawr tawh a, Belgian striker hi a duh hle. Chelsea-ah erawh Lukaku hian hmun a chang meuh lo a, Inter aṭanga a pan hnuah season khat chiah khel hmanin, Inter leh AS Roma-ah te loan-in a khel leh tawh.

Chelsea-in Lukaku an lakluh khan pound maktaduai 100 zet an inseng a, tuna Napoli dawrna erawh £25.6mtd chauh a ni thung! Lukaku hian season hman zawh takah khan Roma tan inelna hrang hrangah match 47 khelin goal 21 a khung a, assist vawi li a nei.