Toney tel lohna Brentford an chak

Brentford chuan Pathianni zan khan Premier League season thar bul an ṭan a, an striker ṭha Ivan Toney tel lo mah se an mikhual Crystal Palace chu 2-1 in an hneh.

Bees mualah hian Bryan Mbeumo leh Yoane Wissa ten goal an khung a, mikhual Eagles goal neih chhun hi Brentford defender Ethan Pinnock-a'n anmahni lama a tih luh palh a ni thung.

Inkhelh ṭan hmain Brentford manager Thomas Frank chuan an striker Toney an telh loh chhan chu, bazar thil vang a nih thu a sawi a, match zawh hnuah pawh England international chanchin hian sawi zui a hlawh.

Frank chuan, "Toney a chhuah leh chhuah loh tur chungchang hi a la tawp lo, amah duhthlanna ngeia club a chhuahsan a nih pawhin a mak lo ang a, sawisel chhan tur pawh a awm hran lo ang.

"Ivan hi player ṭha bikte zinga mi a ni a, khawvela a ṭha berte zinga mi a nih avangin keimahni chauh ni loin club dang pawhin an lo duh ve hi a mak lo. Premier League khel lai player ṭha dangte ang bawkin engtik nia emaw chuan club chhuahsan thei a ni," tiin a sawi.

Toney hian kum 2020 khan Peterborough United aṭangin Brentford hi a zawm, a club tan hian league match 128 aṭangin goal 67 a khungsak tawh a, kum 28 mi niin hmabak a la nei thui vau tura ngaih a ni.

Dan phal loha pawisa inchawina lamah a inhnamhnawih avangin Football Association (FA) chuan thla riat chhung a lo hrem tawh a, kumin January thla aṭang khan a inkhel ve leh thei ṭan chauh.

Inkhel thei loa a awm lai pawh in Bees hian an enkawl reng a, hlawh an pe bawk - a chunga ṭhat chhuahtu Bees hi chhuahsan a tum loh thu pawh a lo sawi fo tawh a ni.

Mahse, tun hnaiah sum ren miah lo Saudi Pro League club Al-Ahli an lo lang a, player leina tur leh an duh anga tam hlawh pek turah an buai miau loh avangin player rilru a ti buai ta zawk ṭhin.

English chanchinbu mite chuan Toney hian European club lian dangte sawmna aiin Al-Ahli lam hi a hnaih zawk niin an sawi a, inbiakna pawh thui tak kalpui tawh niin EPL club a chhuahsan ngei hmel tawh a ni.