CYMA nena kan thawkho hi a lawmawm - MVA President

CYMA leh Mizoram Volleyball Association (MVA) ṭangkawp chuan hlawhtling takin LBS Suzuki 23rd Inter Branch YMA Volleyball Tournament 2024 chu August 5-17, 2024 chhung khan R. Dengṭhuama Stadium, Mualpuiah a buatsaih. '

MVA president Dr. Lalmalsawma Nghaka chuan, "Vawi 23 lai mai MVA hian CYMA nena ṭangkawpin Inter Branch YMA Tournament kan nei thei hi a lawmawm hle. CYMA Volleyball vangin volleyball hian nasa takin hma a sawn phah ṭhin. Tun maia ṭiak ta 23rd Inter Branch YMA Volleyball inelna aṭang pawh hian player thar duhawm tak tak an chhuah ngei ka beisei a, Mizoram Volleyball hmasawn nan rahbi pawimawh tak a ni leh ka ring tlat a ni.

"CYMA nena thawhho hi a nuamin, a zawngchhang thlak hle. CYMA hruaitute, sponsor-te leh he inelna a rawn tel branch YMA zawng zawng te chungah MVA chuan lawmthu kan sawi tak meuh meuh e," tiin Vanglaini a hrilh.

Tun ṭum inelnaah hian mipa inelnaah team 73 telin heng zinga 43 hi Aizawl khawpui chhung branch niin, khawpui pawn aṭangin team 30 an tel bawk. Hmeichhe inelnaah team 28 an tel a, City branch aṭangin team 24 leh City branch pawn aṭangin team pali an tel.