Conte enkawl Napoli an mualpho

Antonio Conte chuan Napoli enkawl hna a thawk ṭan a - Pathianni zan khan Naples club hian tun season Serie A an match hmasa ber khelin Hellas Verona lakah 3-0 in an mualpho.

Mualneitu Verona tan Dailon Livramento-a'n goal hmahruai a khung a, Italian football inelna sang bera a inlan vawi khatnaah Daniel Mosquera chuan goal hnih a khung bawk.

Napoli hian 2022-23 season khan Serie A nomawi an chawi a, khawvel an barakhaih - Diego Maradona hoa an champion hnua an hlawhtlina lehna hmasa ber a ni hial.

Mahse, coach Luciano Spalletti a bang zui a, season hmasa khan manager pathum ngawt an nei hman, insiamṭhat tum hle mah se Serie A-ah 10-na bak an ni phak ta chuang lo a ni.

Nipui laiin Conte an la lut a, ani hi European team lian hrang hrang enkawl tawhtu niin tawnhriat a nei ṭha - Italian football huangah ngei pawh Juventus lo hlawhtlinpui tawhtu a nih avangin a lakah beisei an nei sang.

Chelsea leh Tottenham Hotspur te pawh enkawl tawhtu Conte chuan, "Ni sa hnuaia vur a tuiral ang mai hi kan ni berin ka hria, a hmasa berah chuan Napoli ṭantute, hun harsa tak kara min thlawp tute chungah ngaihdam ka dil.

"Coach ka ni a, kan result ṭha lo hi keima mawhphurhna liau liau a ni," a ti. Luciano Spalletti (2022-23) hnua Napoli manager palina a ni der tawh a, siamṭhat ngai a tam ang tih chu a chiang.

Italian manager chuan player thar chungchang sawi zuiin, "Theih ni se la chuan player pali vel thleng kan mamawh, lakluh pawh kan duh. Chutihrualin club dang pawhin an duh ve tho a, kawng a awlsam vek lo a ni," a ti.

Pathianni zan Serie A inkhel dangah Lazio chuan an mikhual Venezia chu 3-1 in an hneh a; Cagliari leh AS Roma te chu goal awm lo 0-0 in an inhnehtawk ve thung.

Nizan khan Serie A match pahnih a awm zui a, a hnuhnung zawkah Juventus leh Cesc Fabregas-a enkawl Como te an inhmachhawn, anni inkhel hi Serie A round hmasa bera match hnuhnung ber an ni.