Player ngah Chelsea an buai

Premier League match hmasa bera champion lai Manchester City hneh loh hi mualphona a ni lo a, mahse Chelsea erawh an result vang ni loin an player neih dan vangin an buai tih loh theih loh a ni.

Chelsea hian nipui bazarah player 11 ngawt lakluh nan pound maktaduai 185 an hmang a, senior player 40 chuang an kawl mek. Blues-in uchuak taka player an kawl hnem avangin star player ṭhahnem tak squad-ah an telh an ni lo a, chung zingah chuan Raheem Sterling a tel.

Sterling aiawhte chuan, "Raheem hmalam hun chungchangah hian Chelsea lam nen ṭha takin kan inbia a, chutihrualin an mamawh dan hi hriat chian kan duh," tiin a sawi.

Chelsea manager Enzo Maresca erawhin, "Manager-in thutlukna an siam a ngai a, a chang chuan player an lungawi ṭhin lo. Hei chu thil thlen dan pangngai a ni. Kan ṭhatna turin team kan rem a ni mai a, thil dang a awm lo," tiin a khelh phak loh thu a sawi.

English forward Sterling hian July 2022 khan £50m-in Man City aṭangin Chelsea hi a zawm a, match 81 a khelhsak tawh. Tun season match hmasa berah squad a chan phak loh avangin Sterling a lungawi lo a, chutihrualin senior team zingah squad chang pha aiin chang pha lo an tam zawk.

Chelsea website-in senior team-ah player 42 hming a chhawp chhuak a, matchday squad-ah player 20 chauh a dahluh theih. Blues manager thar Maresca tan pawh plyaer tih lungawi sen a ni dawn lo. London club squad chhah lutuk hi fiamthu thawhna a ni hial.