League Cup final-ah Manchester United-in Newcastle United hnehin nomawi an chawi a, hemi hnu hian Erik Ten Hag-a hoten hian Premier League-ah chak ni hmel an hmu tawh lo. An match hnuhnungah phei chuan Wembley Stadium-a an hneh ngei Magpies lakah chiang takin an tlawm.
Zanin dar 12:30 hian Man United-in Brentford an mikhual dawn a, Ten Hag-a hote hi Bees lakah fiahin an awm dawn. Luke Shaw-a'n Newcastle chakna chhan kha an theihna san zawk vang ni loin chak an duh zawk vang tiin a sawi a, Brentford lakah Man United chak châk dan hmuhin a awm ang.
Mualpho vawi 2-na?
Erik Ten Hag hian Brentford hi a hrechiang khawp ang. Dutch manager hnuaiah Man United hian an match hmasa berah Brighton & Hove Albion an hneh lo a, a dawta an hmachhawn chu Bees hi niin 4-0 ngawtin an mualpho.
Nikum August 13-a an inkhelh ṭum hian first half lekah Brentford hian Josh Dasilva, Mathias Jensen, Ben Mee leh Bryan Mbeumo hmangin goal li an khung tawh a, Man United-in a chhanletna a nei lo.
Brentford hi table-a an dinhmun thlir pawhin team vantlang chunglam an ni a, point 43 hmu tawhin Man United nena an inthlauhna hi point sarih a ni. Bees hian Nikum October 23 hnu lam khan Bees hi Premier League-ah vawi khat chiah an la tlawm a, an recod duhawm tak avangin Man United tan zuam chi a ni lo.
Casemiro tel lohna
Man United-in Southampton laka red card hmu Casemiro an la chhawr thei dawn lo a, Brazilian midfielder tel loa nun an zir an mek. Aaron Wan-Bissaka erawh Newcastle United a hmachhawn theih loh hnuin inlan thei dinhmunah a ding.
Magpies an hneh loh ṭumin Marcel Sabitzer leh Scott McTominay ten midfield-ah bul an ṭan a, an che ṭha tawk lo. Bench aṭangin Fred a rawn lut a, Casemiro awm lo mah se midfield siksawi thei dinhmunah Ten Hag-a ding.
Tlarhmaah Anthony Martial chu bench aṭangin a rawn lut a, Brazilian Antony erawh an thlak vangin a lungawi lo. Ajax aṭanga Man United zawmtu Antony hi bench-ah dah pawh ni se, a aia lut turin Jadon Sancho leh Facundo Pellistri te an awm.
Kum 2023 hmang ṭha Marcus Rashford-a'n international break-a England aṭanga a inhnuhdawh hnuah hmasawn lam pan loin a hnung tawlh. Magpies defender hmaah Rashford a 'nil' a, Bees lakah a insiamṭhat a ṭul dawn.
Man United tlarhnungin Newcastle tlarhmaah goal hnih ngawt an chhuah a, Bees-in Ivan Toney leh Bryan Mbeumo te an kawl avangin an fimkhur hle a ṭul ang.
Engtin zel?
Premier Leauge inkhel dangah West Ham-in Newcastle United an mikhual dawn a, Magpies hi Champions League khelh tum an ni. Hammers hian an match hnuhnung berah Southampton an hneh avangin Eddie Howe lakah point hmuh an inbeisei ang.
Chutihrualin Magpies hi pathumnaah awm mek mah se season thara Champions League khel tur chuan chetsual a thiang lo. Table-a 14-naa awm David Moyes-a hote hi an hneh ngei a ṭul dawn a ni.
