Footballer ropui Neeskens

Johan Neeskens hi Mizorama a rawn kal dawn avanga sawi ropui chawp tur a ni lo a, football tana a sulhnu avangin a ropui tawh hrim hrim.

Tunlai ang chu ni se, Lionel Messi leh Cristiano Ronaldo te huangah dah rem lo mah se hemite hnuai - Mohamed Salah, Harry Kane, Robert Lewandowski, Karim Benzema leh player ṭha dangte huangah chuan a tel pha chiang a ni.

Neeskens-a telna Netherlands-in FIFA World Cup final ṭum hnih an thleng tawh a, player pawimawh a ni pha ve ve bawk. Hei hian a theihna sanzia a pholang.

Johan Neeskens chu
• Neeskens hi September 15, 1951 khan Heemstede, Netherlands-ah a piang.

• Kum 71 mi Neeskens hian Racing Club Heemstede-ah bul a ṭan a, Ajax leh Barcelona-ah hming a chher hnuin New York Cosmos tan a khel leh bawk.

• Ajax hi European Cup vawi thum a chawipui a, Eredivisie leh KNVB Cup vawi hnih ve ve a chawipui bawk.

• Barcelona hi Copa del Rey leh European Cup Winners' Cup a chawipui bawk.

• Netherlands tan match 49 khelin goal 17 a khung a, FIFA World Cup-ah kum 1974 leh 1978 khan pahnihna niin kum 1974-ah phei chuan Silver Boot a dawng pha a, All Star Team-ah a tel.

• Football khelh a chawlhsan hnuin Netherlands, Barcelona leh Galatasaray-ah te assistant manager hna a thawk tawh a ni.

• Neeskens hi 1974 World Cup final-a penalty khungtu kha a ni a, total football tihhlawhtlinna kawngah Rinus Michels leh Johan Cruyff te kiangah hmun pawimawh a chang pha a ni.