A sang bik zingah Kvitova kir leh ta

5th April, 2023

Petra Kvitova chu kum 2021 September thla hnua a vawi khat nan hmeichhe tennis thiam zual thlan chhuan 10 zingah a tel phak ve leh ta. Women's Tennis Association (WTA) ranking tharah 10-na dinhmun a luah.

Grand Slam vawi hnih champion tawh Kvitova hian Wimbledon champion Elena Rybakina hnehin Miami Open nomawi a chawi, major tournament dawta inelna ngaihhlut Masters title a lakna hmasa ber a ni.

Kazakhstan nula Rybakina erawhin Indian Wells leh Miami Open champion nih kawp a tumna a hlawhtling thei lo a, world number 7 dinhmun a la luah. Season hmasa Wimbledon champion a nih khan ranking point a awm lo, tun thlengin a la tuar zel.

Hliam vanga chawl lai Iga Swiatek chu a chung berah a la awm zel. Polish nula Swiatek hi nikum April 4 aṭang khan ranking chung berah a la awm char char a, hliam vangin buai ve deuh ṭhin mah se season hmasa a hman ṭhatna khan a dinhmun a la ti nghet zel.