Aizawl FC-in Kerala an pan

I League club Aizawl FC chuan nimin khan Hero Super Cup khel turin Kerala an pan a, Mizo club hian April 6, Ningani hian an match hmasa berah Manipur club Trau an hmachhawn ang.

Super Cup hi knock-out-a khelh tur a nih avangin Aizawl FC-in inelna hmachhawn turin player 20 chauh an thlang a, foreigner pali Akito Saito, Eisuke Mohri, Emmanuel Olugbenga Makinde leh Ivan Veras te an tel.

I League-a Aizawl FC innghahna Henry Kisekka chu a fanu damlohna avangin an ram Uganda-ah a haw a, Mizo club-in an chhawr thei dawn lo. Tun ṭumah hian Mizo coach Victor Lalbiakmawia hnuaiah an khel dawn.

Mizo club khelh ṭanna tur hi second qualifying round a ni a, Manipur club hi an hneh thei a nih chuan group stage-ah ISL club Hyderabad, Odisha leh East Bengal te nen an inhmachhawn thei dawn a ni.