Nuai 400 chawi tur Kerala Blasters-in ngaihdam an dil
Indian Super League playoff match-a titaua khel zo duh lo Kerala Blasters chuan an chet dana an inthiam loh thu sawiin, ngaihdam dilna an ti chhuak a, coach Ivan Vukomanovic pawhin ngaihdam dilna a ti chhuak ve bawk.
India rama football thuneitu sang ber All India Football Federation (AIFF) hnuaia Disciplinary Committee chuan, kar hmasa Zirtawpni khan Blasters leh coach Vukomanovic te hremna hi a ti chhuak a, club hi nuai 400 chawi tura tih niin, Vukomanovic chu match 10 atana hrem niin, nuai nga chawi tura tih a ni bawk a ni.
AIFF chuan Blasters leh Vukomanovic chu mipui hmaa ngaihdam dilna ti chhuak turin an ti bawk a, Blasters hian an ti thei lo a nih chuan an sum chawi tur chu nuai 600-a tihsan tur a ni a, Vukomanovic pawh hi ngaihdam dilna a ti chhuak lo a nih chuan nuai nga dang chawi belh tura tih a ni bawk.
Blasters leh coach Vukomanovic ten sum tam tham tak chawi belh ai chuan ngaihdam dil an thlang ta zawk a, mipui hriata ngaihdam an dil avangin a tira an chawi tura tih bak sum an chawi lo ang.
Buaina chu
March 3, 2023 khan ISL playoff-ah Kerala Blasters leh Bengaluru FC an inkhel a, minute 90 chhung goal a luh loh hnuah extra time khelh a ni. Extra time-ah hian Bengaluru-in freekick an hlawh chhuak a, Sunil Chhetri chuan Blasters player-te inrin hmain a pet.
India captain hian he freekick aṭang hian a chhuih lut a, referee Crystal John chuan goal-ah a pawmsak. Referee thutlukna hi Blasters hian an ngaithiam lo a, a thutlukna sut tura an ngenna a hlawhchham hnuah, inkhelh chhunzawm duh loin khelmual an chhuahsan.
Chhetri chuan, "Kum 22 ka inkhelh ve chhungin hetiang ka hmu ngai lo. Blasters dem emaw thlawp emaw zawnga hei hi sawi ka ni lo a, mak ka ti ve em a ni," a ti a, ISL meuha khel zo duh loa Blasters an chhuak chu mak a ti.
He thutlukna avang hian referee Crystal John bakah Chhetri te hian social media kaltlanga beihna nasa tak an tawk a, mahse, a tawpah chuan a tuartu chu mawi lo taka che Blasters an ni ta a ni.
Pawm tur?
Blasters ṭantu leh football ngaina tam takin Chhetri goal khung hi pawm loh turah an ngai a, mahse, a nihna takah chuan India captain goal khung dan hi a dik thlap - kum 2004 khan Thierry Henry chuan Chelsea lakah hetiang deuh hian freekick a lo khung tawh.
Premier League referee Graham Poll chuan, "Whistle ham kher a ngai lo a, Henry hnenah wall siam kher a duh leh duh loh ka zawt. Mahse, tihian ka pet mai thei em? tiin hawihhawm takin min dil a, ka phalnain a pet a ni," a ti a, Henry goal chu pawm thlap a nih thu a sawi - kum 2017 khan Nacho chuan hetiang tho hian Real Madrid tan Sevilla lakah a lo khung tawh bawk.
Blasters nena an inkhelh zawhah khan Chhetri chuan, "Referee hnenah khan hamrik emaw wall emaw ka mamawh loh thu ka sawi a, ka thutluknaa ka chian leh chian loh min zawt nawn. Ka thutluknaa ka chian thu ka hrilh a, Adrian Luna pawh khan kha kha hriain, ka pet kha lo dan a tum a ni," a ti.
International Football Association Board (IFAB) law 13.3-ah chuan, "Freekick pet a nih a, lehlam player-ten an hnaih lutuk a, tihbuai a nih chuan freekick pet nawn tur a ni. Mahse, 9.15m vela hlaa player chuan rang taka freekick pet chu lo tibuai ta se, referee-in a nih angin freekick chu a kaltlang tir thei ang," tiin a inziak a, Crystal John-a'n thutlukna a siam sual lo.
Ngaihdam dilna
Blasters chet danin ISL hmai a tibal tih phat rual a ni lo a, AIFF pawhin ISL khelh zawh hnuah a ṭul angin Blasters hremna a ti chhuak. Ngaihdam dil tura phut an nih bawk avangin Blasters-in an tihsual an hai lo a, ngaihdam an dil.
South Indian club chuan, "March 3, 2023-a Bengaluru nen kan inkhela thil thleng kha pawi kan ti hle. Khelmual chhuahsan tura thutlukna kan siam kha thinrim laia thutlukna siam niin, a fuh tawk lo tih pawh kan hria. Football khawvel hmaah ngaihdam kan dil a, khatiang thil kha a thlen nawn tawh loh nan theihtawp kan chhuah ang," an ti.
Serbian coach Ivan pawhin thuchhuah siamin, "Infiamna khelmualah khatiang thil kha chu thleng lo tur a ni a, kha thila ka inhnamhnawih kha ka inthiam loin, pawi ka ti hle a ni.
"Inhriatthiam tawnna nen, hlim takin kan hmaa chona hmachhawn ila. Keimahni tuhrah chu keimahni ngeiin sengin, hma hun duhawm zawk nei turin theihtawp chhuah ang u," a ti a, amah thlawptu zawng zawng chungah lawmthu a sawi bawk.