Empoli an chak ve leh ta

Thawhṭanni zan Serie A inkhelah Empoli chuan Lecce 1-0 in an hneh, kumin January thla hnu lamah Empoli hian Italian football inelna sang berah hian a vawi khat nan hnehna an chang ve leh ta chiah.

Inkhela goal awmchhun hi Francesco Caputo-a'n minute 62-naa a khung a ni a, a zawna match li an tlawm hnuah Empoli an chak ve leh ta a, tla thei china awm Verona aiin point 12-in an la sang.

Empoli manager Paolo Zanetti chuan, "Hun harsa tak kan hmachhawn a, chumi kara goal hlu tak mai kan khung thei hlauh khan min tilawm hle. Thawhhona ṭha tak hmangin hnehna kan sual chhuak.

"Kan hmabakah AC Milan a ni dawn, anni hi hmahruaitu Napoli 4-0 a sawp thei hlim an ni a, a harsa khawp ang. Mahse, keini pawh hian ṭha taka kan khelh chuan team lian hneh turin theihna kan nei," a ti.

Inkhel dangah Sassuolo leh an mikhual Torino chu 1-1 in an inhnehtawk, mualneitu tana Andrea Pinamonti goal khung chu second half-ah mikhual lamin Antonio Sanabria hmanga sutin goal dang a lut zui tawh lo.