Muguruza a la chawl rih dawn

Wimbledon champion hlui Garbine Muguruza chuan kumin nipui thleng tennis khelh rih loh a tum. Spanish player hi clay bakah grass court season chhungin a hmel kan hmu ve dawn lo tihna a ni.

Kum 29 mi Muguruza hian kuminah match li chiah a la khel, world ranking lamah pawh 132-naah a tlahniam tawh. A vanglai chuan number 1 dinhmun hial pawh a lo luah phak tawh - tunah erawh a sang zual 10 zinga tel phak pawh a harsa tawh ang.

Grand Slam vawi hnih champion tawh Muguruza chuan, "Chhungkua leh ṭhiante nena hun hman chu a nuamin a hlimawm a, a hrisel hle bawk. Chuvangin tuna ka chawlh mek hi nipui thleng atan ka pawtsei," a ti.

Muguruza hian 2016 khan a Grand Slam nomawi hmasa zawk ni turin French Open title a la, a kum lehah Wimbledon champion a ni zui bawk. A hnu lamah erawh major title a la dawng leh lo, 2021 WTA Final nomawi a chawi kha inelna a hmachhawna a champion hnuhnung ber a ni.