Trossard khelh danah Arteta a lawm

Arsenal manager Mikel Arteta chuan thlasik bazara an lei Leandro Trossard khelh danah a lungawi thu a sawi a, a ṭul a nih chuan tlarhma khawi laiah pawh chhawr theih turin a thiam tawk tih a sawi bawk.

Belgium international hian Brighton & Hove Albion tan season a hmang ṭha viau a, kha tih laia an manager Graham Potter kaihhuaina hnuaiah player pawimawh a ni - goal sarih pawh a khung hman, heng zingah hian Anfield-a hattrick a siam chuan hriat a hlawh zual.

Potter a chhuak a, amah thlaktu Roberto De Zerbi lakah erawh Trossard hi a tla na vak lo. December 26 kha Brighton tana a khelh hnuhnung ber niin January thla tawp lamah Arsenal a zawm.

January thla khan Brighton manager Roberto De Zerbi chuan, "Player thawkrim leh tihtakzeta khel ka ngaina, chutiang mi ni lo tan chuan hmun chan a harsa," tiin Trossard chungchang a lo sawi tawh a ni.

Trossard-a'n Brighton chhuahsan a duh a, thlasik bazara Mykhailo Mudryk lei tumtu Arsenal nen an inbe rem daih, chhuah duh a nih avangin a man pawh a tam lo, pound maktaduai 21 chauhin kum 2027 thleng atan an la fel der.

Emirates Stadium a pan hnuah Trossard hian season bul a ṭan fuh kha a chhawm nung thar. Tun hnaiah phei chuan Premier League match ruk aṭangin a ṭhiante goal khung tur vawi sarih lai a siamsak.

Arsenal manager Arteta chuan, "Leandro Trossard-a theihna hi kan ringhlel lo a, team tana danglamna thlen thei a ni tih kan hriat vanga la pawh kan ni. Arsenal tana a tha thawh danah ka lawm, a chet vel dan hian min tilungawi hle.

"A ṭul a nih chuan mual hma lam sir ding lam emaw, vei lamah emaw a khel thei. Tlarhma laiah striker atan a hman theih a, striker hnung chiahah striker pui turin a tlan thei bawk," tiin a player thar chu a dah sang hle.

Premier League season kal laiah Trossard hian assist vawi kua a nei tawh, ani aia nei hnem chu Manchester City thiampuipa Kevin De Bruyne (13) leh Arsenal tana a khelh pui Bukayo Saka (10) te chauh an ni.

Trossard hian Saka leh Bukayo Saka te a khelhpui thei tih a takin a lantir tawh. International match an khelh zawhah khan Arteta-a'n Gabriel Jesus nen a tlan dun tir leh a, North London club tana minute 90 a khelhna hmasaah hian Jesus khung tur a siamsak leh nghal.

Arteta chuan, "Mawhphurna a la ngam a, team tan a theihna zawng zawng a hlan," a ti. Spanish manager hian tun kar tawpa Liverpool an hmachhawn hunah pawh duhthlan tur a nei dawn tihna a ni a, a ṭha zawnga rilru hahna tur zawk a ni ang.