Rafael Nadal a inhnukdawk

Tennis inelna langsar zinga mi clay court season an ṭan dawn a, mi tam tak hmuh châk chu Rafael Nadal a ni. Mahse, vanduai thlak takin Nadal hi a inkhelh thiamna hmunah hian a inkhel thei dawn rih lo.

April 8 aṭanga khelh tur Monte-Carlo Masters-ah Nadal hi champion lai a ni a, a nomawi humhim thei tura ngaih ni mah se a hliam a la dam loh avangin a inlan thei dawn lo, a inkhelh theih hun tur pawh a la sawi chiang thei lo a ni.

January thlaa khelh Australian Open second round-ah Nadal hian Mackenzie McDonald a hneh lo, he match hi khel zo mah se a khel bawr hliam vangin a ṭhat dan takin a khel thei lo - a hnu lamah pawh tournament a la khel zui leh thei miah lo.

Nadal a chawl vang vanga, clay court season-ah chuan lo kir tura ngaih ni mah se nimin khan thu thar a rawn nei. Nadal chuan, "Inelna lian leh sang hmachhawn turin ka la inpeih lo, tennis ka khelh chhunga ka tana tournament pawimawh berte zinga mi ka khel thei dawn lo a ni.

"Ka tan chuan Monte Carlo hi a hlu a, inlan ngei theih pawh a châkawm hle. Mahse, inbuatsaihna a ṭha tawk thei lo a, dam var lo chuan inkhelh luih chi a ni lo," a ti. Kar riat chhung vel chawl tura ngaih kha beisei aia rei a chawl dawn.

Tunah Nadal a la dam lo a, mi tam takin an ngaihtuah nghal chu French Open atan a inpeih hman ang em, tih a ni. Clay court inelna lian ber hi May 28 aṭanga khelh tur a ni dawn - Nadal hi a dam hman a nih pawhin inbuatsaihna hun a nei tam thei dawn lo.

Grand Slam champion hnem lamah Nadal leh Novak Djokovic te an in nihrual mek, nomawi 22 ve ve an chawi tawh. Major title lak hnem lamah Nadal tan French Open hi dinhmun siamṭhat theihna hun tur a ni, a inlan thei lo a nih chuan a tan channa lian tak a ni ang.