Chawl tawh Amir Khan an hrem

British boxer Amir Khan chuan inkhelh chawlhsan tawh mah se, February 2022-a Kell Brook nen an inhnek ṭumin damdawi hman phal loh a lo hmang tih hmuhchhuah a ni a, kum hnih chhung atan hrem a ni.

Kum 36 mi light-welterweight world champion hlui hi taksa tihchakna 'ostarine' hmangah puh a ni a, Amir Khan chuan hrem a nihna chu a pawm rualin, damdawi chu tum reng vanga hmang a nih loh thu a sawi.

Amir Khan chuan, "Thil dik lo ka ti ngai lo. Mahse, kum hnih chhung atan inhnek thei lo tura hrem ka ni a, ka chawlh tawh miau avangin a nuihzatthlak duh angreng hle a ni.

"Ring chhunga lo kir leh tura ruahmanna engmah ka nei lo a, dawt ka sawi ngai lo a, ka ti ngai hek lo ang - ka inhmeh ve lo a ni," a ti a, hnehna chan theih nan thil dik lo a tih ve ngai loh thu a sawi.

Amir Khan hian a taksaa damdawi an hmuh chu supplement fuh lo emaw midang kaltlanga a kaiah a puh a, mahse, UK Anti-Doping (UKAD) chuan hei hi an pawm lo.

Hetihrual hian Amir Khan-a taksaa an damdawi hmuh chu tlem tham te a nih thu sawiin, hre reng chunga hmang luiah an ngai lem lo a, taksa tihchakna tham a hmangah an ngai lo a ni.

UKAD chief executive Jane Rumble chuan, "Infiamna thianghlim zawk neih zel a nih theih nan UKAD chuan chak takin hma a la zel dawn, tih lantirna a ni," a ti.

Amir Khan hian 2004 Athens Olympics-ah khan kum 17 mi lek niin silver medal a hlawh chhuak a, kum 2005-ah professional boxer ni zuiin, kum 2009 khan Andreas Kotelnik chu Manchester Arena-ah hnehin world champion a ni a, WBA light-welterweight title a hlawh chhuak.

Khan hian a kawnghren hi vawi nga zet humhimin, kum 2011 khan Zab Udah chu hnehin IBF light-welterweight title a hlawh belh a, mahse, December 2011-ah Lamont Peterson laka tlawmin a title pahnih hi a hloh.

Peterson hian damdawi hman phal loh a lo hmang tih hmuhchhuah a nih hnuah Khan hi WBA title hi pek leh a ni a, mahse, a inhnek leh hmasa berah Danny García hmachhawna ngam loin, a title hi a hloh lehnghal a ni.

Amir Khan hian a professional career-ah vawi 40 fight hmachhawnin, vawi 34 hnehna a chang a, vawi ruk a tlawm - vawi 21 a khingpui a knockout thei.

Kell Brook nena February 2022-a an intawn kha a inhnek hnuhnung ber niin, round ruknaah technical knockout hmangin a tlawm a, May 2022 khan inhnek a chawlhsan thu a puang a ni.