A hmun ngaiah Djokovic a let

Mipa tennis thuneitu sang Association of Tennis Professionals (ATP) chuan Thawhṭanni zan khan world ranking thar an ti chhuak a, a chung berah Novak Djokovic chua a lawn sang leh ta.

Serbian star hi tun hnai tournament pahnihah a inlan lo. Indian Wells champion chungin Carlos Alcaraz-a'n pakhatna dinhmun a luahlan a, mahse Spanish star hian Miami Open lamah a nomawi leh ranking point a hum zo lo.

Inkhel lo mah se Djokovic tan pakhatna nih theihna kawng a inhawnna chhan chu, a elpui Alcaraz-a'n season hmasa lama a champion avanga a ranking point neihsa a hum theih loh vang a ni - Serbian star tan chanchin ṭha a ni thung.

Djokovic hian point 380-in hma an hruai fal, tournament pakhat khelh fuh leh khelh fuh loh lekah an dinhmun hi a la inthlak thei reng. Pathumna Stefanos Tsitsipas erawhin a chunga mite pahnih hi point 1000 chuangin a thlau a ni.

Tun kar hi Djokovic tan chawlhkar 381 chhung number 1 a nihna a ni dawn, mipa leh hmeichhe tennis player zingah number 1 ni rei thei ber a ni. Hun rei tak chhung record lo chelh tawh Steffi Graf-i (kar 377) chu hmanni deuh khan a lo khum tawh a ni.

Pahnihnaa tlahniam leh ta Alcaraz hi a vannei tawk lo, kum 19 mi chauh ni chungin US Open nomawi a chawi bakah number 1 a ni. Mahse, number 1 a nih hnuah hliam vangin thla li chhung a inkhel thei lo, tun hnaiah a lo kir ve leh chauh.

Clay court season an hmang ṭan dawn, a bikin Europe khawmualpuiah chuan Covid 19 inkaihhruaina vanga player zin theih lohna ram langsar a awm lo. Title leh ranking point inchuhin Djokovic leh Alcaraz an inel dawn, a hmuhnawm khawp ang.