Vawiinah Dist Junior Boys Football Final

Mizoram Inter District Junior Boys Football C'ship 2023 final chu vawiin tlai dar 2:00 hian Kolasib Sports Stadium-ah Lawngtlai leh Saitual ten an khel ang. Team pahnih hian final kalkawngah an khingpuite chiang takin an hneh zel a, final hmuhnawm tak ni tura beisei a ni.

Kolasib District FA-in inelna hi ṭha takin an thleng a, final pawh hi YouTube Channel 'Sangtea Ezra Ethan'-ah en theih a ni dawn. Saitual-in MFA hnuaia mipa inelnaah nomawi an la chawi ngai lo a, champion ngei an duh dawn. Chutihrualin Lawngtlai lamin Mizoram chhim lamah nomawi hawn ngei an duh ang.

Saitual hian final kalkawngah match li an khel tawh chungin goal an la chhuah miah lo a, goal 14 ngawt an khung tawh. An forward Isak Lalruatfela'n goal ruk a khung tawh a, match hmasa berah chiah a khung lo.

Lawngtlai erawh match hmasa berah Khawzawl lakah 3-1 in an tlawm a, chutihrualin result aṭanga teh chi a ni lo - match hmasa berah hian chance an hlah nasa. Match hnihnaah erawh Lawngtlaiin an theihna an lantir a, Serchhip 7-0 in an hneh.

Lawngtlai hian Aizawl 4-0 in an hneh zui a, semifinal-ah an district ṭhenawm Siaha chu 4-1 in an sawp leh bawk. Final thleng turin goal li chhuah mah se goal 16 ngawt an khung - Saitual aiin goal an khung tam tawh zawk.

Inelnaah hian district 11 an tel vek a, kum 17 hnuai lam inelna niin January 1, 2007 leh December 31, 2009 inkar chhunga piangte chauh an tel thei a ni.