Conte bantu Tottenham an chak zo lo

Tottenham Hotspur-in coach Antonio Conte an chhuah zalen hnua an match hmasa berah team talbuai Everton an hmachhawn a, Thawhṭanni zan khan an mikhualna ramah an chak zo lo - Merseyside club nen hian 1-1 in an inhnehtawk.

Spurs tan Harry Kane chuan penalty hmangin goal hmahruai khung mah se Everton-in tlawm bik an duh lo a, Michael Keane chuan minute 90-naah goal ropui hmangin Everton si phurh a sut.

Tottenham tan goal dang khung leh turin hun a tam tawk tawh lo a, chak beisei khan 1-1 result hlawh chhuakin, point khata lungawi an zir - Goodison Park-a inkhel boruak 'hot' takah hian player pahnih hnawhchhuah an ni!

Minute 58-naah Toffees midfielder Abdoulaye Doucoure chu Kane laka a chet dan avangin hnawhchhuah a ni a, Spurs tan bench aṭanga luhtir Lucas Moura chu minute 88-naah hnawhchhuah a ni bawk - Conte nena an inṭhen hnuah pawh Spurs-in eng ruai an ang lo.

Inhlau lo

Everton hian January thla tawp lam khan coach Frank Lampard chu banin, a hmun ruakah Sean Dyche an lalut. Burnley boss hnuaia an match hmasa berah rin loh takin Arsenal (1-0) chu ngam mah se a hnua league match sarih an khelhah vawi hnih chiah an chak leh tawh a, relegation zone an hlatna a la tam lo.

Hetihlai hian Spurs tan coach Conte nen an inṭhen hnua an match hmasa ber a ni a, coach lailawk Cristian Stellini hoin point thum aia tlem hmuh an tum lo - season thara Champions League khelh phak ngei an duh.

Team pahnih hmabak a ko a, an tum inang lo mah se an tana chak a pawimawh dan erawh a danglam lo - Everton hian Demarai Gray, Doucoure leh Idrissa Gueye hmangin chance duhawm nei vek mah se an chhawr lo a, Spurs thawnthu a danglam bik lo.

Kane chuan chance duhawm vawi hnih nei mah se goal-ah a chantir thei lo ve ve a, tun season-a beisei phak lo Son Heung-min pawhin Jordan Pickford-a zawnah bak a pet thei bik lo - team pahnih an intiat tawk hle.

And...Action!

First half-ah team pahnihin goal an khung lo ve ve a, second half-ah erawh thil a danglam - goal hnih a lut a, red card pahnih kan hmu bawk! Kan hmuh hmasak ber erawh red card a ni.

Doucouré leh Kane ten ball an inchuhna lamah an indim lo tawn a, insum thei lo fal Doucouré chuan Kane hi a hmaiah a kutin a nawr - referee-in hei hi chiang takin a hmu si a, Doucouré chu minute 58-naah a phu ang ngeia red card pein, a hnawt chhuak.

Minute 10 a liam a, Spurs-in a tam zawk nih an chhawr dawn niin a lang hman. Everton defender Keane chu Cristian Romero lakah a foul a, referee-in a nih dan tur ang thlapa thutlukna siamin, penalty spot a kawk.

Spurs tan Kane a lo pen chhuak a, kum 29 mi striker hian tun season-a a league goal 22-na ni turin goal-ah a chantir a, player tam zawk an nih bawk avangin London club hi an chak ngei dawn niin a lang.

Mahse maw...

Beiseina sang tak neih hnuah pawh, "Mahse..." tih a ngaih chang a awm fo a, Spurs pawh an beisei ang ngawtin thil a kaltluang lo - minute 88-naah bench aṭanga lut Moura chuan hlauhawm takin Keane a rap a, khelmualah minute sarih chiah a awm hman tihin hnawhchhuah a ni.

Everton an phur laklawh - minute 90-naah Keane a inlar a, English defender hian yard 25 vela hla aṭangin mawi zetin si phurh sutna goal a khung a, hliam dam hlim Hugo Lloris tan dan ngaihna a awm lo.

Goal dang lut loin inkhel a tawp zui a, team pahnihin point an insem - Everton hi table-ah 15-naah an awm mek a, point 27 neiin, 18-na Leeds United aia an sanna chu point khat chiah a ni a, match khatin an khel tam bawk. Leeds hi nizan khan Nottingham Forest nen an inkhel a, an result kan hre hman lo - result a zirin an inthlauhna a danglam leh ang.

Everton dinhmun hi a tawi thei anga hrilhfiah chuan, relegation zone-a la awm reng ang an ni. Spurs pawh table-ah palina la ni mah se pangana Manchester United nen an point hmuh zat a inang a, match hnihin an khel tam zawk bawk. Season thara Champions League khel lo thei dinhmunah an la ding reng.