UEFA Champions League-ah zanin dar 11:45 hian Fatih Terim Stadium-ah Istanbul Basaksehir leh Manchester United te an inkhel dawn. 

Ole Gunnar Solskjaer hote Europe-ah an che ṭha a, match hmasa pahnihah PSG leh RB Leipzig-te an hneh avangin Turkish club hi an hneh leh theih chuan hahdam takin group stage khelh hmabak an hmachhawn thei ang.

Group H inkhel dangah zanin dar 1:30 hian RB Leipzig leh PSG te an inkhel dawn a; German club leh  French champion hian point thum ve ve an hmu tawh.  Man United-in hmun ruak pakhat an chan hmel tawh avangin hmun ruak pakhat hi team pahnih hian an inchuh dawn niin a lang.

Season liam ta Europa League quarterfinal-ah team pahnih hi intum ngei tura ngaih an ni a, amaherawhchu Istanbul Basaksehir hi Copenhagen laka an tlawm tak si avangin an inhmachhawn lo. Tun ṭum hi  Istanbul Basaksehir leh Manchester United inhmachhawn vawi khatna tur a ni.

Owls hian Man United defender hlui Rafael da Silva, Liverpool defender hlui Martin Skrtel leh Chelsea striker hlui Demba Ba te an kawl a, Premier League-ah hming an chher vek tawh. Turkish player pawimawh erawh Edin Visca a ni a, Bosnian attacking midfielder hi zaninah en bik a sual lo ang.

Champions League chauh thlir chuan Man United hi chak ngei turah an ngaih theih. Ole Gunnar Solskjaer hote hian an match hmasa berah PSG 2-1 in an hneh a, RB Leipzig 5-0 in an sawp zui; amaherawhchu United hian an match hnuhnung berah Arsenal an hneh lo a, Solskjaer sawiselna pawh a ri ring nghal hle.

Arsenal legend Tony Adams chuan United manager Solskjaer-a'n tum mumal a neih loh thu a sawi a, Man United legend Roy Keane pawhin Norwegian manager hi an ban hnaih a rin thu a sawi hial.

English club hi Premier League match ruk an khelh aṭangin vawi hnih chiah an chak a, vawi thum chak loin point sarih chauh hmuin 15-naah an awm.

United-in kum 2016 khan pound maktaduai 89 zetin Juventus aṭangin Paul Pogba an lalut a, French midfielder hi FIFA World Cup nomawi thlenga chawi tawh a nih avangin a theihnaah rinhlelh tur a awm lo. Amaherawhchu Solskjaer tibuaitu ber chu Pogba a ni a, season liam ta khan hliam vanga a khelh mumal loh bakah chhuak turin thuthang a nei reng.

Tun season-ah Covid-19 positive vangin Pogba-a'n training a zawm tlai a, ram tana a khelh ṭumin Real Madrid tana a khelh châk thu a sawi chhuak.

French midfielder hian khelmual pawna thawm nei ring mah se khelmual chhungah erawh eng ruai a ni lo. Solskjaer-a'n a ṭhatna tak a la hmu fuh lo nge, amah hi a tlahniam zawk?

United-in Pogba bakah midfield laia chhawr theih Bruno Fernandes, Fred, Scott McTominay, Donny Van de Beek, Nemanja Matic leh Juan Mata-te a kawl a, Solskjaer-a'n a mamawh aia tam a kawl avangin harsatna a tawk.

Nipui transfer laiin Norwegian manager-in Jadon Sancho lakluh a duh a, United thuneituten an laksak theih loh avangin 'out and out winger' rintlak an nei lo. 

Covid-19 positive vangin Alex Telles a la chhawr theih dawn loh avangin mual sir lam bawk hi an  buaina tur a ni thei a, chutih rualin a laia lut tur azirin an buai leh viau thei bawk.

United-in PSG aṭangin Edinson Cavani an lalut a, Uruguayan striker hian match thum khel tawhin bench aṭang vekin a lalut. Cavani hian khelmualah minute 56 chiah hun a la hmang a, goal a la khung lo.

Napoli leh PSG tana hming chher tawh Cavani hian Arsenal nen an inkhelh ṭumin ball ṭha a hmu lo a, United-in mual sir lam aṭanga ball vawrh luh an neih loh avangin mahni ball inzawn chawp a ṭul. 

United-ah hian 'born striker' an tih ṭhin Radamel Falcao meuh pawh a hlawhchham tawh avangin Cavani hun hi a inher chhuak lo thei bawk.