Sergio Aguero hliam a dam hnai

Manchester City manager Pep Guardiola chuan a striker inhliam mek Sergio Aguero chu November international break zawhah a lo kir theih a beisei thu a sawi a, Argentine forward chungchangah a hman-hmawh loh tur thu a sawi tel bawk. 

Kum 32  mi striker hi October-a West Ham nen an inkhelh ṭumin a khupah a inhliam a, Hammers laka a inhliam hma hian a khup hliam vangin thla li zet chu a lo chawl tawh.

Guardiola chuan, "International break zawhah chuan a dam tawh kan beisei a, ni tinin hma a sawn ve zel a ni," a ti a, Aguero hian tun season-ah match hnih chiah la khelin goal khat a khung tawh thung.

Manchester City hian nizan khan Greece club ṭha Olympiacos nen Champions League match an khel a, Pathianni zan dar 10:00-ah Premier League match khel turin champion lai Liverpool an mikhual zui ang.