Poch-a'n lo kir a hmanhmawh lo

Tottenham Hotspur manager hlui Mauricio Pochettino chuan football khawvela coaching hna thawk leh turin a hmanhmawh loh thu a sawi a, England-ah a kir dawn leh dawn loh a la sawi thei lo bawk. 

Kum 48 mi coach hi November 2019 khan Spurs chuan a hna aṭangin an chawlhtir a, London club-in an ban hnuah hian Real Madrid leh Manchester United nen sawizawm ni mah se club dang a la enkawl leh lo. 

Argentine coach, "Ka tana ṭha tur ka la nghak mek a, kawngkhar ka la khar lo. Ka rilru mil pui project-a nih chuan ka rilru a inhawng reng a, football coach hna hi ka tan chuan hna a ni mai lo a, ka thinlung awmna hmun a ni," a ti. 

Jose Mourinho-a'n a thlak tak Poch hian a ṭha tur a nih chuan coach hna chelh loa nghah reng pawh chu pawi a tih loh thu a sawi a, Covid-19 vangin chawlh rih pawi a tih loh thu a sawi tel bawk. 

Poch chuan, "Khelmuala fans awm lo chuan football tak tak pawh a angin ka hre lo a, chuvang chuan kum khat dawn ka chawl tawh angah ka inngai hran lo. 

"Game chu a pangngai reng a la ni a, mahse thinlung zawng zawnga inpekna leh tumna kha hmuh tur a awm lo a ni. Hetianga football kalpui a ngai ta mai hi a mak a, mi zawng zawngin hun harsa kan tawng mek a ni," a ti. 

Spurs-in a hna aṭanga Poch an chawlhtir khan Premier League table-ah 14-na an ni a, a hma season chiahah Champions League final a hruai thleng thung. 

Pochettino hian May 2014 khan Spurs enkawl hna hi a thawk ṭan a, a season hmasa berah hian League Cup final an khel nghal. 

Argentine coach enkawlna hnuaiah hian Spurs hi season hnih chu league-ah pathumna an ni a, kum 2017-ah khan pahnihna niin 2018-19 season-ah palina a nihpui bawk.