Leeds tan Leicester an thiam hret

Leicester City chuan Leeds United 4-1 in an sawp a, manager Brendan Rodgers a naute hian season hmasa ang bawkin Premier League bul an ṭan fuh hle - eng tianga thui nge an thlen theih dawn tih chu hunin a la her chhuahpui ang.

Thawhṭanni zan inkhel dangah Fulham chuan anmahni ang bawka talbuai West Brom 2-0 in an hneh a, 17-naah inhlangkaiin chak lo Baggies erawh 18-naah an tlahniam thung; inhamtang tur chuan hna a hautak chho viau dawn.

Elland Road-a inkhelah a tir aṭangin Leicester an nung ṭha hle, minute hnihna lekah defender Robin Koch ball pek sual dawngtu Jamie Vardy chuan Harvey Barnes tan duhthusama ṭha siamsakin goal hmahruai a khung.

English striker Vardy-a ball tauh chu keeper Illan Meslier-a'n lo dang hman mah se a per let chu Youri Tielemans-a'n hnai tak aṭangin a khung, chawlh lawk hnuah Leeds lamin Stuart Dallas hmangin an chhanglet a, an tlarhnung erawh a pawp chhunzawm.

Leeds midfielder Pablo Hernandez chuan si phurh sut zawh theihna hun ṭha nei mah se goal bar a pet per a, minute 76-naah Vardy hun a thleng thung. Cengiz Under-a'n keeper leh defender bumin Vardy tan a siamsak a, goal khung turin harsatna a awm lo.

Foxes lamin an la duhtawk mai lo, hun tawp hma chiahin James Maddison penalty hlawhchhuah chu Tielemans-a'n ama goal hnihna leh Foxes goal lina ni turin a khung a, khualmualah nuamsa takin hnehna an chang.

Season hmasa khan Leicester City hi nomawi chuh phak zinga mi an ni a, mahse krismas hnu lamah an zuih - season a tawp meuh chuan a sang pali zingah pawh an tel phak lo; manager Rodgers pawh a ṭawng fimkhur tawh hle.

Rodgers chuan, "Ka naute hi an chhuanawm takzet, tuna kan dinhmun hi lungawina mai tur a la ni lo. Nakkum March emaw April emaw velah pahnihna dinhmun kan luah a nih chuan a ropui ang, tunah chuan kawng zawh tur thui tak a la awm," a ti.

Leeds manager Marcelo Bielsa chuan, "A tir lam minute 30 chhung khan kan tlarhnung a buai em em a, a hnu lamah erawh sut theihna hun ṭha kan insiam hnem viau thung. Match tin mai hi inzirna a ni a, a bik takin chak loh hnua inkhelh leh chiah hi a pawimawh," tiin hmalam a thlir.

Argentine manager hian Championship lamah a naute hi a hlawhtlinpui tawh a, inelna sang EPL-ah pawh team hmuhnawm zinga mi an ni mek. Chutihrualin thleng sang tur chuan goal khung mai ni loin tlarhnung rem phui an mamawh hle.

Kai thar pahnih Fulham leh West Brom te hi Premier League aṭanga tla leh mai tura rinkai zinga mi an ni a, an pahnih inkhel bika hnehna changtu Scott Parker naute tan point thum hlu bik tia sawi theih a ni.

Fulham tan Bobby Decordova-Reid leh Ola Aina ten goal an khung a, an goal pahnih hi striker palian Aleksandar Mitrovic siamsak ve ve a ni - goal an neih theih nan Serbian striker palian a thawh hlawk hle.

West Brom manager Slaven Bilic chuan, "Training-na hmunah chuan kan ti ṭha thei hle, khelmual chhungah erawh minute 25 chhung chauh kan zir angin kan khel thei. Kawng engkimah keini aiin an chungnung zawk, hetianga khel tur kan ni lo," a ti.

Fulham manager Parker chuan, "Entu awm loa inkhelh hi chu a harsa ṭhin ngei mai, mahni muala khel pawh ni ila fans an awm loh chuan a boruak nuam tak kha a awm thei lo. Hnehna kan chan hian inrintawkna min pek ngei ka beisei," a ti. England ram inkharkhip dawn mah se EPL chu an khel chhunzawm zel ang.