Ronaldo hoin Juve; Barca hna a awlsam?

Barcelona laka tlawm hlim Juventus-in zanin dar 1:30-ah Champions League group stage match khel turin Ferencvaros an lenchilh dawn a, Cristiano Ronaldo an neih tawh avangin an phur sawt ang. 

Juve hian Champions League-a an match hnuhnung berah Ronaldo tel loin Barca an mikhual a, 2-0 in an tlawm. Zaninah erawh Covid-19 vanga a inkhunghran reng hnuah Ronaldo an nei leh tawh dawn a, Italian champion hi chak chiang saah tam takin an dah a nih pawhin a mak lo ang. 

Group G inkhel dangah Barcelona chuan zanin dar 1:30 vek hian Dynamo Kiev an mikhual dawn a, La Liga lama talbuai team hi European football-ah chuan an la hlauhawm reng avangin chak tura rinkai zawk an ni. 

Nou Camp-a lenglut tur Dynamo Kiev hian he thu buatsaih a nih lai hian Covid-19 vangin an player pariat an inlan theih loh tur thu an tichiang tawh a, Barca tan hna a awlsam sawt tura ngaih a ni. 

Juventus-in Serie A-ah rei tak chhung ro an rel tawh a, Real Madrid aṭanga Ronaldo an lakluh chhan lian tak chu Champions League nomawi chawi an duh vang a ni. 

Ronaldo-a'n Real ang thoin Juventus-ah goal khung a ṭhulh san lo a, mahse an lakluh chhan ber European football-a ropuina erawh Italian club hi a la khum pui thei bik lo. 

Portuguese forward hi kum 35 mi a ni ve tawh a, season a zawh meuh chuan kum 36-a ni tawh dawn - football khawvelah hun tam a nei tawh lo tih a chiang a, tun season hi Ronaldo tan hun ṭha a ni. 

Mahse, chu ropuina nei tura Juve-in tih tur an neih hmasak chu round of 16 luh phawt a ni a, match hnihah point thum chauh an la neih avangin zaninah an chak a ṭul ang. 

Juve-in Ronaldo awm loh chhungin inelna hrang hrangah match li an khel a, vawi khat chiah an chak - Pathianni zan khan Spezia lakah Ronaldo a lo kir a, goal hnih a khung nghal a, a team hi 4-1 in a chakpui. 

Ronaldo-a tel chuan Juventus an danglam tih a lang chiang a, Spezia laka bench aṭanga lut forward hi zaninah chuan inkhel bul ṭan tura beisei a ni - goal a khung loh ring suh. 

Hetihlai hian defender pahnih Matthijs de Ligt leh Alex Sandro-te chu Juve tan an inlan theih a la rinawm loh a, Merih Demiral chu hrem a nih avangin a inlan thei lo bawk ang. 

Hungarian club Ferencvarosi hi an ṭhat dan berin an inlan thei dawn bik lo. Bosnian defender Eldar Civic chu he thu buatsaih thleng hian a dinhmun a la chiang lo a, Albania international Myrto Uzuni chu Covid-19 vangin a inlan thei dawn lo bawk. 

Barcelona-in tun hnaia an tlak chhiat chhanah president Josep Maria Bartomeu an puh a, Bartomeu-a'n banna a thehluh hnuah result erawh a danglam phah chuang lo. 

Catalan club hi tun season-ah an phur rei hleithei lo - Ferencvaros 5-1 ngawta an sawp hnu lawkah El Clasico khelin Real Madrid lakah 3-1 in an tlawm a, a hnu lawkah Juventus chu 2-0 in an hneh zui.

Mahse, Juve muala an chak hnuah club tenau Alaves chu 1-1 in an inhnehtawkpui a, La Liga table-ah 12-na an ni mek - zaninah insiamṭhat an tum ang. 

Ukrainian club-in Covid-19 vangin player pariat an chhawr thei dawn lo chiang a, eng team tan pawh player pariat ngawt inlan thei lo tur hi chu buaina a tling. 

Dynamo hian Covid-19 vangin Georgiy Tsitaishvili, Denys Garmash, Mikkel Duelund, Alexander Karavaev, Tudor Baluta leh Mykola Shaparenko an chhawr theih loh tur thu an puang a, a hma hian an goalkeeper pahnih Georgiy Bushchan leh Denys Boyko chu Covid-19 vang thoin an lo inkhung hrang tawh bawk. 

Ukrainian club hian an league match hnuhnung berah kum 18 mi goalkeeper Ruslan Neshcheret chu si ban an nghahtir a ṭul hial a, Dnipro-1 lakah 2-1 in an chak tho - tuna an hmachhawn tur erawh Barca an ni a, a harsa dawn. 

Player mai an ni lo - assistant coach Emil Karas chuan Covid-19 a kai ve bawk avangin team a ṭawiawm thei dawn lo a, coaching staff pali dang chuan he hri leng hi an kai bawk. 

Ukrainian club-in player leh coaching staff kim lo chungin Nou Camp an lenglut dawn tihna a ni a, Barca hian heti chunga hnehna an chang thei lo a nih chuan chhuanlam tur a tam lo ang. 

Barcelona thiampuipa Lionel Messi-a'n tun season-a Catalan club match zawng zawng a khel kim vek a, minute-a khel kim vek - hahdam a mamawh. 

Spanish chanchinbu lar Marca chuan Ronald Koeman-a'n kum 33 mi forward hi chawlh hahdamna a pek a rinawm thu a tarlang. Hetihrual hian tun season-a penalty aṭang chiaha goal la khung Messi hian goal khungna remchang zawngin inkhelh hram a duh thei bawk. 

Argentine forward hian tun season inelna hrang hranga match riat an khelh tawhah goal thum chiah a la khung a, penalty aṭang veka lut a ni - assist vawi li a nei tawh tih hriat tel erawh a ṭha. 

Barca keeper Marc-Andre ter Stegen-a'n dam lam a pan ṭan a, mahse Koeman-a'n Dynamo lakah goal a ventir nghal a rinawm loh. Gerard Pique-a'n hremna a tawrh zawh tawh avangin tlarhnunga Clement Lenglet dinpui turin a lo kir thei tawh ang.