Klopp-a'n Salah a chhan

Liverpool manager Jurgen Klopp chuan Mohamed Salah-a'n West Ham laka penalty a hlawhchhuah chungchanga sawisel a tawhna chu awm lo a tih thu a sawi a, a player chhuanvawr a chhan hle. 

Reds hian Hammers laka si an phurh hmasak hnuin penalty hmangin an si phurh an sut a, a tawpah 2-1 in an chak. Salah hi West Ham defender Arthur Masuaku chuan a pet fuh a, penalty ngei tur nia a lan rualin Egyptian forward hi a tlu uar hret niin a lang. 

Klopp chuan, "Eng nge sawi theih ka neih? Foul dik tak a ni. Kha inkhela thil thleng hmu zawng zawng deuhthaw chuan penalty-ah an ngai a ni. Mo pawh ka bia a, hliam tenau hmun thumah a nei.

"Salah hliam pakhat chu penalty a hlawh-chhuahna aṭang khan a ni. Penalty kan hmuh ngei tur tam tak pek kan ni lo a, mahse kan sawi zui ngai lo. Kan phu ang ngei penalty kan hmu a, ni hnih thum hnu thlenga sawi zui a ni hi ka hrethiam lo," a ti!

Salah bakah hian Brighton & Hove Albion laka penalty hlawh chhuak Harry Kane pawhin sawiselna a tawk a, pundit tam takin player pahnih hi an sawisel - The Times-a ziaktu leh talkSPORT host, Liverpool ṭantu ni bawk Tony Cascarino leh Liverpool player hlui Danny Murphy-te chu player pahnih sawiseltu langsar an ni.