Indian Premier League: Delhi leh Bangalore ten playoff an thleng

Indian Premier League inkhel hmuhnawm takah November 2, Thawhṭanni khan Delhi Capitals-in wicket rukin Royal Challengers Bangalore an hneh. Delhi hian hnehna an chan avangin pahnihna dinhmun an nemnghet a, qualifier 1 an khel dawn. 

Bangalore pawh chak lo mah se Delhi an insawptir loh avangin Kolkata Knight Riders leh Sunrisers Hyderabad hnuaiah an awm thei tawh lo a, playoff lut ve bawkin eliminator an khel dawn. 

Sheikh Zayed Stadium-ah Delhi-in vawm hmasak an thlang. Virat Kohli hoten an bat hmasa a, Devdutt Padikkal-a'n run 50 a siam. Captain Kohli-a'n run 29 leh AB de Villiers ten run 35-in belh mah se run 152/7 chauh an siam.

Delhi Capitals bat hun a thleng a, over 17.3-ah hnehna an chang a nih chuan Bangalore hi net run-rate hmanga tla thei dinhmunah an ding. Shikhar Dhawan (54) leh Ajinkya Rahane (60) te an che ṭha a, amaherawhchu over 19-ah run 154/4 siamin an chak.

Bangalore an chak lo nachungin Delhi Capitals awlsam taka an chak tir bik loh avangin playoff an khel dawn. Kohli hote hian Kolkata Knight Riders emaw Sunrisers Hyderabad an hmachhawn ang.

Indian Premier League-ah hian playoff hi semifinal a ni nghal lo a, Qualifier 1, Eliminator leh Qualifier 2-ah ṭhenhran a ni. Qualifier 1-a chak loin Qualifier 2 an la khel thei a, hemi awmzia chu league round-a pakhatna leh pahnihna dinhmun luah hi a pawimawh hle tihna a ni.

Tun ṭuma pakhatna Mumbai Indians leh pahnihna Delhi Capitals te inkhela chak lo zawk hian Qualifier 2-ah Eliminator-a chak zawk an hmachhawn dawn a, final kawng a la inhawng. Nizan khan Sunrisers Hyderabad leh Mumbai Indians an inkhel a, Hyderabad hi an chak a nih chuan playoff an khel dawn. Sunrisers hi an chak lo a nih erawh chuan Kolkata Knight Riders-in playoff an khel thung ang.