Coric leh Cilic te an chak

Tennis inelna Paris Masters khelh laiah Croatian tlangval pahnih, Borna Coric leh Marin Cilic-te chuan an khingpui ve ve hnehin second round an inhlangkai.

Thawhṭanni zan inkhelah seeded 15-na Coric hian Marton Fucsovics 7-6 (5), 6-1 in a hneh a, a service ṭha leh na tak chu a chakpui - a match lehpekah chuan Jordan Thompson a hmachhawn leh ang.

Coric chuan, "A awlsam lo ṭhin hle mai, Grand Slam ni lo mah se Masters ho hi chu khelh a hautak ṭhin a, chetsual theihna vek a ni," a ti. A hmachhawn leh tur Thompson hian Federico Delbonis chu 6-2, 6-3 in a lo hneh ve thung.

US Open 2014 champion Cilic tan fiahna paltlang nghal a ngai. Cilic hian Canadian rawlthar Felix Auger-Aliassime lakah game hloh loin set khatna chu a la mai, mahse set hnihna a hloh ve thung. Set hnuhnung berah erawh a tawnhriat ngah zawk chungnungin Cilic-a'n 6-0, 3-6, 6-3 in hnehna a chang hram.

Inkhel dangah Feliciano Lopez pawhin Filip Krajinovic chu 7-6 (11), 6-1 a hnehin first round a paltlang ve bawk a, Spanish tlangval hian seeded pakhatna Rafael Nadal a hmachhawn dawn avangin a hmabak a hautak dawn hle.