Mizoram sorkar chuan nawrna awm mah se, tuialhthei man a tihniam dawn lo. Chief minister Lalduhoma'n tuialhthei aṭanga cess an lakte mipuite tan hman vek tum a nih thu sawiin, "Kawng a ṭhat leh tuialhthei man a tlakhniamin lirthei chuan man a tlawm phah ngai lo," a ti a; hmarchhakah Mizoram aia tuialhthei man sanna state pathum an la awm thu a sawi.

Nimina thuthar thehdarhtu ṭhenkhatte'n an kawmnaah Chief Minister chuan, October 16, Nilainia Council of Ministers ṭhukhawmin tuialhthei man tihniam lo tura thutlukna an siam thu a sawi a, "Diesel-ah VAT 10%-in kan tisang a, social infrastructure & services cess leh road maintenance cess-ah litre khatah Rs. 2 ve ve lak a ni. Diesel man hi litre khatah Rs. 80.30 aṭangin Rs. 87.99-ah a pung," a ti a, a lan danah chuan 'in tisang nasa mange aw' tih theih a nih thu a sawi.

Lalduhoma chuan Covid-19 hmaa diesel rate chu lirte khatah Rs. 86.37 a nih thu sawiin, "Kan tihpunna hi Rs. 1.62 chauh a ni a, kan tipung nasa hranpa lo. Hmarchhak state kan en kual a, keini aiin Sikkim, Nagaland leh Assam-te an la sang zawk," a ti.

CM Duhoma chuan petrol chungchang sawiin, "Petrol-ah hian VAT-ah 18%, social infrastructure & services cess leh road maintenance cess-ah litre khatah Rs. 2 ve ve lak a ni. Covid hmaa a rate Rs. 101.30 a ni a, tuna kan tihpun hnu hian Covid hma aiin Rs. 2.09 in a la tlawm zawk," a ti a, tipung ta viaua sawi chu rate hlui aṭanga chhût chuan diesel-ah Covid hma aiin tlemin a pung a, petrol-ah phei chuan a hniam zawk thu a sawi.

Mizoram kilkhawr dante, inkalpawh harsat dante chhûtin state dang aiin to mahse àwm loah an ngaih loh thu sawiin Chief Minister chuan, "Lakluh a harsa a, sum hman a tam. Chuti chungin a sang ber kan la ni chuang lo," a ti.

Lalduhoma chuan tuialhthei man an tihpun chhan mipuiin hriatpui se an duh thu sawiin, "Tuialhthei aṭanga cess kan lak zawng zawng hi mipui tan kan hmang vek dawn. Kan mamawh ngawih ngawih atan mipuiin litre khatah Rs. 2 thawh ve se kan ti a ni. Social infrastructure & services cess hi thil chi li atan kan hmang dawn a, road maintenance cess hi kawng atan liau liau kan hmang dawn," a ti a, cess tlingkhawm hi thildang atan pawhpèn theih a nih loh thu a sawi.

Chief Minister sawi danin, social infrastructure & services cess hmanna turte chu - sikul sakna atan, addl. classroom atan, digital education system atan, science laboratory atan, slow learner centre atan, technical college atan, damdawi-in leh PHC tihchangtlunna atan, sub centre dinna atan, hriselna lama thawktu lakna atan, skill development lama ṭhalaite inzirna hmun tihchangtlunna atan, women hostel-a thawktu tur lakna atan leh thildang pawimawhahte a ni.

Kawng an buaipui chhan chu fur khat daih loa siam a nih ṭhin vang a nih thu sawiin Chief Minister chuan, "Kan kawngte hi kan hun hmalama contractor hoin an thawh a, an la thawh zawh lohte a ni. Agreement-ah sorkar lam chan a chhe em em a, bill-ah an induhsak nen. Pawisa an la ṭeuh tawh a, tunah hian contractor tam tak chuan ban daih ila an duh zawm em em a, kan ban chuan sum an la chhuak hnem tawh sia, a buaithlak a ni," a ti.

Chief Minister chuan kawng neih ṭhat theihna atan mipui nen ṭangrual ila an tih thu sawiin, "Mipuite hian kawng siamna atan tuialhthei litre khatah Rs. 2 thawh ve se kan ti a ni. Chutiang a nih chuan, kawng a chhiatin mipuiin kawng siamna atan pawisa ka thawve tiin sorkar an nawr ngam lehzual ang. Tuna kawngte hi chu kan hun hmaa siam vek a ni," a ti a, an sorkar hnua hnathawhte chu uluk taka vil zel a ni dawn a, a ṭhat loh chuan sawisel an inhuam thu a sawi.

Lirthei neitute'n kawng chhiat laia an rate-te kawng ṭhat hnuah an tihniam duh bik lo nia sawiin Lalduhoma chuan, "Entirna atan Champhaite hi darkar 3 chuang kal chauh a ni tawh a, lirthei chuan man a hniam chuang lo. Covid laia tuialhthei man a hniam vak pawhin rate an tihniam duh bik lo. In dem zawnga kal chuan indem thei vek kan ni. Sorkar hriatpui loa duh duha rate tihsan hi ṭha kan ti lo, a tuartu chu mipui an ni," a ti bawk.