MLA-in Champhai Auditorium tur a tlawh; Keilungliah Dam pedal boat service a hawng

Adviser to CM (technical) H Ginzalala, Champhai North bialtu MLA ni bawk chuan nimin zing khan Champhai DC Pisa hmun hluia Champhai Auditorium sak mek a tlawh a, hna thawktute chu an hna uluk taka thawk chhunzawm zel turin a chah. MLA hian October 16, Nilaini khan Champhai Keilungliah tuikhuahah pedal boat service a hawng bawk.

Champhai Auditorium sakna atan hian North Eastern Council (NEC) aṭangin cheng nuai 1295.98 leh Mizoram sorkar aṭangin a chungkhuh (canopy) siamna tur te, lirthei dahna (parking area) tihzauhna leh a panna kawng laihna tur sum hmuh a ni a; auditorium hi sq.m 2878.6-a zau tur leh mi 800-1000 vel leng tura ruahman a ni.

Auditorium sakna tur hmunhma laih rem hna thawh mek a ni a, a satu contractor SK Construction-te chuan October thla chhung hian bungrua inlak khawm fel a, sak ṭan vat theih an inbeisei thu an sawi.

H Ginzalala hian Nilaini khan Keilungliah tuikhuah (Dam)-ah pedal boat service a hawng a; Keilungliah Dam chu sorkar hmasa pahnihte bulṭan leh hmawr bawk a nih thu sawiin, sorkar kaltate thawhrimnaah lawmthu a sawi a, "Champhai district-a khualzinte tlawh tur hmunhma te chu Swadesh Darshan kaltlanga changtlung taka siam chhoh tum a ni a, Keilungliah Dam-ah hian speed boat pawh dah leh tum a ni. Keilungliah Dam tlawhtute tan restaurant-te, riahna turte leh venhimna lamte a hmunah dah ala ni dawn a, hmalakna tur hmachhawp a la tam hle," a ti.

Pedal boat service bulṭan nan lawng pali dah phawt a nih thu sawiin H Ginzalal chuan, "Chetsualna a thlen palh chuan kan hmathlirte a tihchhiat vek theih avangin fimkhur taka enkawl a ṭul. Keilungliah Dam hi Champhai ti Champhai tu a la nih chhoh zel dawn avangin ngaihtuahna thar nen tihhmasawn zel tum a ni," a ti a, khualzinte hipna pawimawh tak a nih theihna tura buatsaih zel tum a nih thu a sawi.