MZU Vice Chancellor-in Saitual College a tlawh

MZU vice chancellor Prof. Dibakar Chandra Deka chuan nimin khan Govt. Saitual College (GSC) a tlawh a; GSC chu arts stream chauh ni lo, science stream pawh hawn a nih theih nana hma la turin thawktute a chah.

Prof. Dibakar Chandra Deka hian GSC principal Lalzarmawia leh a thawpuite chu kawmin, Aizawl khawpui pawn college a tlawh hmasak ber a nih thu a sawi a; NEP an kalpui aṭangin nakkum hi kum thum an zirna leh graduate hun tur a nih tawh thu te, NEP-in a duan anga kum li zir thei turin college chuan ruahmannna a neih leh neih lohte a zawt a, "NEP-in a ruahman anga kum li chhung zir tur kalpui a nih theih chuan zirlai naupangin kum khat chauh university an kal a ngai tawh dawn a, chu chu thingtlang leh chhungkaw harsa zawk aṭanga zirlaite tan malsawmna thlentu a ni thei dawn," a ti.

Govt. Saitual College chu arts zirna chauh ni lo, science streams hawn theih dan kawng ngaihtuaha theihtawp chhuaha hma la turin MZU Vice Chancellor chuan GSC Principal leh a thawhpuite a chah a, "Zirnain hma a sawn zel theih nan ṭhahnemngai takin thawk zel ang che u," a ti bawk.

MZU Vice Chancellor hi MZU CDC director Prof. Lalbiakdiki Hnamte-in a ṭawiawm a ni.